મેટ પોલીસે એન્ડ્રુ માઉન્ટબેટન વિન્ડસરની સીક્યુરીટી માટે નજીકથી કામ કરનાર ભૂતપૂર્વ અને સેવા આપતા અધિકારીઓને ઓળખી, તેમનો સંપર્ક કરી તેમની નોકરીના સમયગાળા દરમિયાન જે કંઈ જોયું અથવા સાંભળ્યું હોય અને તે તપાસમાં ઉપયોગી લાગે તેવી જાતીય ગુનાઓ અંગેની નવી અથવા સંબંધિત માહિતી આપવા જણાવ્યું છે.
પોલીસે બધા આરોપોને ગંભીરતાથી લેવામાં આવશે અને તમામ માહિતીનું મૂલ્યાંકન કરવામાં આવશે અને જ્યાં યોગ્ય હોય ત્યાં તપાસ કરવામાં આવશે તેવી ખાતરી આપી છે. પોલીસ આ અંગે નેશનલ કોર્ડીનેશન ગૃપ સાથે કામ કરી રહી છે જેથી યોગ્ય કુશળતા અને માર્ગદર્શન સહિત અભિગમની સુસંગતતા સુનિશ્ચિત કરી શકાય.
યુએસ ડિપાર્ટમેન્ટ ઓફ જસ્ટિસ દ્વારા જેફરી એપ્સટેઈન સંબંધિત લાખો કોર્ટ દસ્તાવેજોના વધુ પ્રકાશન પછી મેટ પોલીસે સ્વાકાર્યું હતું કે લંડન એરપોર્ટનો ઉપયોગ માનવ તસ્કરી અને જાતીય શોષણને સરળ બનાવવા માટે થઈ શકે છે. પોલીસે તે દસ્તાવેજોનું મૂલ્યાંકન કરી સક્રિયપણે વધુ વિગતો માંગી છે.
મેટ પોલીસે આ અગાઉ જેફરી એપસ્ટેઇન અને ગીસ્લાઇન મેક્સવેલ સાથે સંકળાયેલા જાતીય શોષણ માટે પહેલાના ટ્રાફિકિંગ સંબંધિત આરોપોની સંપૂર્ણ તપાસ કરી હતી. તે સમયે ક્રાઉન પ્રોસિક્યુશન સર્વિસ (CPS) પાસેથી સલાહ લઇ યુએસના અધિકારીઓનો સંપર્ક કરાયો હતો.
પરંતુ પોલીસે જણાવ્યું હતું કે નવેમ્બર 2016માં એન્ડ્ર્યુ સામે સંપૂર્ણ ફોજદારી તપાસ નહિં કરવાનો નિર્ણય લેવાયો હતો અને તેની ઓગસ્ટ 2019, 2021 અને 2022માં ફરીથી સમીક્ષા કરવામાં આવી હતી. 2025માં એન્ડ્રુ માઉન્ટબેટન-વિન્ડસરે 2011માં તેમના મેટ પોલીસ ક્લોઝ પ્રોટેક્શન ઓફિસરને વર્જીનીયા ગિફ્રેની તપાસ કરવા કહ્યું હોવાના આરોપોની તપાસમાં કોઇ ગુનાહિત કૃત્ય અથવા ગેરવર્તણૂકના કોઈ વધારાના પુરાવા જાહેર થયા ન હતા.
એન્ડ્ર્યુની ધરપકડ બાદ પૂર્વ પત્ની સારા ફર્ગ્યુસન પણ તકલીફમાં
ભૂતપૂર્વ પતિ પ્રિન્સ એન્ડ્ર્યુની ધરપકડ બાદ સારા ફર્ગ્યુસનના ભવિષ્ય વિશે પ્રશ્નો વધી રહ્યા છે. ડચેસ ઓફ યોર્કે 1996માં એન્ડ્ર્યુને છૂટાછેડા આપ્યા હતા પરંતુ તે પછી પણ તેઓ તેમની નજીક રહ્યા હતા. સારાએ હજુ સુધી જાહેરમાં ટિપ્પણી કરી નથી. તેમણે એન્ડ્ર્યુના એપ્સ્ટેઈન સાથેના જોડાણ, આરોપો સામે સતત બચાવ કરી વર્જિનિયા ગિફ્રેના દાવાઓને ફગાવી દીધા હતા.
ફર્ગ્યુસનની પોતાની પ્રતિષ્ઠા પણ તપાસનો વિષય બની રહી છે. કેમ કે યુએસની તપાસ ફાઇલોમાં તેણીએ એપ્સ્ટોઈન પાસેથી મેળવેલી નાણાકીય સહાયની વિગતવાર માહિતી આપવામાં આવી છે, જોકે ફર્ગ્યુસન દ્વારા કોઈ ગુનાહિત ગેરરીતિ કરાઇ હોય તેવો ઉલ્લેખ નથી.
