અમેરિકામાં છેલ્લા 250 વર્ષમાં એક અનોખું પરિવર્તન જોવા મળી રહ્યું છે. વોલ સ્ટ્રીટ જર્નલના રીપોર્ટ મુજબ, ગત વર્ષ કરતાં દેશમાં નવા આવી રહેલા લોકો કરતાં વધારે વધુ અમેરિકનો દેશ છોડીને જતા રહ્યા છે. આ સ્થિતિ મહામંદી પછી જોવા મળી નથી. બ્રુકિંગ્સ ઇન્સ્ટિટ્યૂશનની ગણતરી અનુસાર, ગત વર્ષે અમેરિકામાં નવા આવનારા લોકો કરતાં સ્થાનિકોનું દેશ બહાર નીકળી જવાનું પ્રમાણ વધારે હતું, જે મુજબ, દોઢ લાખ જેટલા લોકો ઓછા થયા છે. વર્તમાન વર્ષમાં બહાર જવાનું વલણ વધવાનું અનુમાન છે. કન્ઝર્વેટિવ મીડિયા હાઉસના રીપોર્ટ પ્રમાણે, 2025માં કુલ માઇગ્રેશન ઘટીને 2.6થી 2.7 મિલિયનની વચ્ચે નોંધાયું હતું, જે 2023માં છ મિલિયન જેટલું હતું.
ગત વર્ષના 15 દેશના આંશિક ડેટાનું વિશ્લેષણ કરતાં જણાયું હતું કે, ઓછામાં ઓછા 180,000 અમેરિકનો ત્યાં સ્થાયી થયા હતા. આ અંગેના સંપૂર્ણ ડેટા જાહેર થયા પછી આ સંખ્યા વધવાની સંભાવના છે. આ રીપોર્ટ મુજબ, જોકે, એવો કોઈ એક ડેટા ઉપલબ્ધ નથી જેમાં વિદેશમાં વસવાટ કરતાં હોય તેવા ચારથી નવ મિલિયન જેટલા અમેરિકનોની સંપૂર્ણ માહિતી હોય. સ્ટેટ ડીપાર્ટમેન્ટના અનુમાન મુજબ 2022માં મેક્સિકોમાં 1.6 મિલિયન અમેરિકનો રહેતા હતા. કેનેડામાં 250,000થી વધુ લોકો વસે છે. યુકેમાં 325,000થી વધુ અમેરિકનો રહે છે, જે અત્યારે યુરોપમાં રહેતા 1.5 મિલિયનથી વધુ અમેરિકનોનો એક હિસ્સો છે. પોર્ટુગલમાં કોવિડ મહામારી પછી અમેરિકનોની સંખ્યામાં 500 ટકાથી વધુનો વધારો નોંધાયો હતો, ત્યાં ફક્ત 2024માં જ 36 ટકાનો વધારો થયો હતો. આયર્લેન્ડમાં 2025માં 10,000 અમેરિકનો પહોંચ્યા હતા, જે સંખ્યા અગાઉના વર્ષ કરતા લગભગ બમણી હતી. ગત વર્ષે જર્મનીના નાગરિકો અમેરિકામાં આવ્યા તેના કરતાં વધુ અમેરિકનો જર્મનીમાં પહોંચ્યા હતા.
આ સ્થિતિ અંગે વ્હાઇટ હાઉસના પ્રવક્તાએ જણાવ્યું હતું કે, દેશનું અર્થતંત્ર અન્ય વિકસિત રાષ્ટ્રો કરતાં વધુ સારું પ્રદર્શન કરી રહ્યું છે અને એડમિનિસ્ટ્રેશન લાખોની સંખ્યામાં વસતાં ગેરકાયદે ઇમિગ્રન્ટ્સનો દેશનિકાલ કરીને ‘અસંખ્ય અતિ સમૃદ્ધ વિદેશીઓને આકર્ષી રહ્યું છે. કેટલાક સમૃદ્ધ વિદેશીઓ ‘અમેરિકામાં સ્થાયી થવા ગોલ્ડ કાર્ડ માટે એક મિલિયન ડોલર ચૂકવી રહ્યા છે.’ ડીપાર્ટમેન્ટ ઓફ હોમલેન્ડ સીક્યુરિટીના રીપોર્ટ મુજબ, ગત વર્ષે 675,000 લોકોનો દેશનિકાલ કરાયો હતો અને 2.2 મિલિયન લોકોએ ‘સ્વેચ્છા’એ દેશ છોડ્યો હતો.
