ઇંગ્લેન્ડની ફ્રેન્ચાઇઝી લીગ ધ હંડ્રેડની કેટલીક ટીમો ખેલાડીઓની આગામી હરાજીમાં પાકિસ્તાનની ક્રિકેટરોને બાકાત રાખે તેવી પૂરી શક્યતા છે. ખાસ કરીને ઇન્ડિયન પ્રીમિયર લીગ (આઇપીએલ)ની ટીમો હિસ્સો ધરાવે છે તેવી ધ હંડ્રેડની ટીમો આગામી મહિને થનારી ખેલાડીઓની હરાજીમાં પાકિસ્તાનની ખેલાડીઓ માટે બોલી લગાવશે નહીં, એમ રીપોર્ટમાં જણાવાયું હતું.
ધ હંડ્રેડમાં આઠ ફ્રેન્ચાઇઝી છે. આમાંથી માન્ચેસ્ટર સુપર જાયન્ટ્સ, એમઆઈ લંડન, સધર્ન બ્રેવ અને સનરાઇઝર્સ લીડ્સમાં આઇપીએલની ટીમો હિસ્સો ધરાવે છે.
21 જુલાઈથી 16 ઓગસ્ટ દરમિયાન યોજાનારી ધ હન્ડ્રેડની આગામી સીઝનમાં ખેલાડીઓના પગારમાં નોંધપાત્ર વધારો થવાની શક્યતા છે, કારણ કે ટુર્નામેન્ટમાં ખાનગી રોકાણમાં વધારો થયો છે. જોકે પાકિસ્તાની ક્રિકેટરોને આ નાણાકીય લાભ મળવાની શક્યતા ઓછી છે. ભારત અને પાકિસ્તાન વચ્ચેના વચ્ચેના તણાવપૂર્ણ રાજદ્વારી સંબંધોને કારણે ૨૦૦૯થી IPL ફ્રેન્ચાઇઝીઓએ અત્યાર સુધી કોઇ પાકિસ્તાનની ક્રિકેટરોને સામેલ કર્યા નથી.
ઇંગ્લેન્ડ અને વેલ્સ ક્રિકેટ બોર્ડ (ECB)ના એક વરિષ્ઠ અધિકારીએ એક એજન્ટને સંકેત આપ્યો છે કે તેમના પાકિસ્તાની ખેલાડીઓમાં રસ ફક્ત એવી ટીમો સુધી મર્યાદિત રહેશે જે IPL સાથે જોડાયેલી નથી. બીજા એજન્ટે ભારતીય રોકાણ ધરાવતી T20 લીગમાં આ સ્થિતિને ‘અલિખિત નિયમ’ ગણાવી હતી.
જોકે ઇસીબીના પ્રવક્તાએ જણાવ્યું હતું કે ધ હંડ્રેડ વિશ્વભરના પુરુષ અને મહિલા ખેલાડીઓનું સ્વાગત કરે છે અને અમે અપેક્ષા રાખીએ છીએ કે આઠ ટીમો તેનું પ્રતિબિંબ પાડશે.ધ હંડ્રેડ હરાજી માટે ૧૮ દેશોના લગભગ ૧,૦૦૦ ક્રિકેટરોએ નોંધણી કરાવી છે, જેમાં ઓસ્ટ્રેલિયા, દક્ષિણ આફ્રિકા, ન્યુઝીલેન્ડ, પાકિસ્તાન અને વેસ્ટ ઈન્ડિઝના ૫૦થી વધુ ખેલાડીઓનો સમાવેશ થાય છે.”
