અમેરિકામાં સ્થાનિક મીડિયા રીપોર્ટ મુજબ, ઓહાયો ગવર્નરની ચૂંટણીમાં વિવેક રામાસ્વામી લોક સમર્થન મેળવવામાં તેમના ડેમોક્રેટ હરિફ એમી એક્ટનથી પાછળ છે.
સર્વેના નવા ડેટામાં જણાયું છે કે, તાજેતરમાં ઓહાયોમાં લોકો રીપબ્લિકન પાર્ટીની તરફેણમાં હોવા છતાં છતાં પ્રેસિડેન્ટ પદના ભૂતપૂર્વ ઉમેદવાર રામાસ્વામીને સર્વેમાં બેવડો ફટકો પડ્યો છે. ક્વોન્ટાસ ઇન્સાઇટ્સ દ્વારા મધ્ય માર્ચમાં કરવામાં આવેલા આ સર્વેમાં એક્ટન પાસે 45.9 ટકા મત સાથે પાતળી બહુમતી છે, જ્યારે રામાસ્વામીને 44.9 ટકા મત મળ્યા હતા. સંભવિત 809 મતદારોના સર્વેમાં જણાયું છે કે, મતદારોએ કોઈપણ એક ઉમેદવારને હજુ સુધી બહુમતી સમર્થન જાહેર કર્યું નથી. રીપોર્ટ અનુસાર, આ સ્થિતિ એક અઠવાડિયામાં આ બીજીવાર ઊભી થઇ છે કે, જેમાં રામાસ્વામી સર્વેમાં પાછળ છે. ઓહાયો એન્વાયર્નમેન્ટલ કાઉન્સિલ દ્વારા અગાઉ કરવામાં આવેલા સર્વેમાં ઘણો મોટો તફાવત જોવા મળ્યો હતો, જેમાં તેઓ એક્ટનથી 10 પોઇન્ટ પાછળ હતા, તેમને 43 ટકા અને એક્ટનને 53 ટકા મત મળ્યા હતા. જોકે, રામાસ્વામીને રાજ્યમાં પક્ષ દ્વારા અને વર્તમાન એડમિનિસ્ટ્રેશન તરફથી નોંધપાત્ર ટેકો મળ્યો છે. રીપોર્ટ મુજબ, રામાસ્વામી માટે આવી સ્થિતિ હોવા છતાં ઘણા રાજકીય વિશ્લેષકો માને છે કે, રાજ્યમાં નવેમ્બરમાં યોજાનારી ચૂંટણીમાં રીપબ્લિકનની જીત થશે. પ્રાયમરી ચૂંટણી પાંચ મેના રોજ યોજાશે.
