એક સર્વેમાં જણાયું હતું કે, અમેરિકામાં ભારતીય મૂળના પરિવારો સરેરાશ સ્થાનિક અમેરિકન કરતાં અંદાજે 80 ટકા વધુ આવક મેળવી રહ્યા છે. ભારતીય અમેરિકન પરિવારોએ 151,200 ડોલરની સરેરાશ વાર્ષિક આવક નોંધાવી હતી, જે સરેરાશ અમેરિકન કરતાં 83,700 ડોલરથી ઘણી વધારે છે. ભારતીય અમેરિકનો દેશના તમામ મુખ્ય વંશીય ગ્રુપોમાં આ મુદ્દે મોખરે છે. પ્યુ રીસર્ચ સેન્ટરના તારણોમાં જણાવવામાં આવ્યું હતું કે, ભારતીય અમેરિકન પરિવારો દર વર્ષે અંદાજે 67,000 ડોલર વધુ આવક મેળવે છે, અથવા સામાન્ય અમેરિકન પરિવારની તુલનાએ અંદાજે 80 ટકા વધુ છે. આ રીપોર્ટ મુજબ, અમેરિકાની કુલ વસતીમાં ભારતીય અમેરિકનોની સંખ્યા 4.8 મિલિયન જેટલી છે, જે પ્રમાણમાં 1.4 ટકા જેટલો નાનો હિસ્સો ધરાવે છે. વસતીમાં આટલો સામાન્ય હિસ્સો હોવા છતાં, પ્રોફેશનલ્સ, ટેકનિકલ અને વિશેષ ક્ષેત્રોમાં તેમની ઉચ્ચ સહભાગીતાને કારણે તેમનો આર્થિક પ્રભાવ નોંધપાત્ર છે. ‘આ ઉપરાંત અન્ય વધુ આવક મેળવી રહેલા એશિયન સમુદાયોમાં પણ, ભારતીય અમેરિકનો મોખરે છે.’
આવક મેળવવાના મુદ્દે ભારતીયો પછીના ક્રમે તાઇવાન અમેરિકન પરિવારો છે, તેઓ અંદાજે 133,300ની સરેરાશ આવક સાથે બીજા સ્થાને છે. ભારતીય અમેરિકન પરિવારો તેમનાથી અંદાજે 13-14 ટકા વધુ આવક મેળવે છે. રીપોર્ટ મુજબ, તમામ એશિયન અમેરિકન પરિવારો માટે સંયુક્ત સરેરાશ આવક અંદાજે 105,600 ડોલર છે, જે હજુ પણ સરેરાશ ભારતીય અમેરિકન પરિવાર કરતા ઘણી ઓછી છે. ભારતીય અમેરિકનોની આ વધુ આવક સરકારની તિજોરીમાં પણ નોંધપાત્ર યોગદાનમાં આપે છે. ભારતીય અમેરિકન પરિવારો સામૂહિક રીતે અંદાજે છ ટકા ટેક્સ ચૂકવે છે, જે દર્શાવે છે કે, તેઓ વધુ આવક ધરાવતા વર્ગમાં મહત્ત્વપૂર્ણ સંખ્યામાં છે અને પ્રોફેશનલ તરીકે પણ ખૂબ જ સક્રીય છે.
