અમેરિકાના રાજકીય ફલક પર વધુ એક ભારતીય મૂળની મહિલા પોતાનું પ્રભુત્વ જમાવવા જઈ રહી છે. મૂળ તમિલનાડુમાં જન્મેલી ૩૧ વર્ષીય રિની સંપથ વોશિંગ્ટન ડીસીના મેયર પદની ચૂંટણી માટે પ્રાઈમરી બેલેટમાં સ્થાન મેળવનાર પ્રથમ દક્ષિણ એશિયાઈ ઉમેદવાર બની ઇતિહાસ રચ્યો છે.
ડેમોક્રેટિક પાર્ટીના ઉમેદવાર અને વ્યવસાયે ગવર્નમેન્ટ કોન્ટ્રાક્ટર એવા રિની સંપથે ‘ફિક્સ ધ બેઝિક્સ’ અને ‘નવા ડીસી’ના સંકલ્પ સાથે પોતાના ચૂંટણી પ્રચારના શ્રીગણેશ કર્યા છે. તેમણે ભારપૂર્વક જણાવ્યું છે કે તેઓ કોઈ રાજકારણી નથી કે નથી કોઈ ખાસ હિત ધરાવતા જૂથો સાથે જોડાયેલા, પરંતુ તેમનું મુખ્ય લક્ષ્ય શહેરની પાયાની સુવિધાઓને સુધારવાનું છે.
તમિલનાડુના થેનીમાં જન્મેલી રિની સાત વર્ષની ઉંમરે અમેરિકા આવી હતી અને છેલ્લા એક દાયકાથી વધુ સમયથી વોશિંગ્ટન ડીસીમાં સ્થાયી થઈ છે. પોતાની ઉમેદવારી અંગે ઉત્સાહ વ્યક્ત કરતા તેમણે જણાવ્યું હતું કે, માત્ર ચાર સપ્તાહમાં જ લોકોના સમર્થનથી તેઓ મેયર પદની બેલેટ યાદીમાં સ્થાન મેળવવામાં સફળ રહ્યા છે, જે દર્શાવે છે કે જનતા પરિવર્તન ઈચ્છી રહી છે.
મેયર તરીકે ચૂંટાયા બાદ પોથોલ્સ (ખાડા) પૂરવા, પોટોમેક નદીમાં ગંદા પાણીના નિકાલને અટકાવવો, મોંઘવારી ઘટાડવી અને ૯૧૧ હેલ્પલાઈનનો વેઈટિંગ ટાઈમ સુધારવો જેવી પાયાની સેવાઓ તેમની પ્રાથમિકતા રહેશે.
નોંધનીય છે કે વોશિંગ્ટન ડીસીમાં ૧૯૭૫થી મૈયર પદની ચૂંટણી શરૂ એશિયાઈ ઉમેદવાર થઈ ત્યારથી અત્યાર સુધી ક્યારેય કોઈ રિપબ્લિકન મેયર બન્યા નથી અને અહીં ડેમોક્રેટિક પાર્ટીનું વર્ચસ્વ રહ્યું છે. આગામી ૧૬ જૂને પ્રાઈમરી યોજાશે, જ્યારે મુખ્ય ચૂંટણી ૩ નવેમ્બરના રોજ યોજાનાર છે. આ રેસમાં રિની સંપથની સાથે જેનીસ લુઈસ જ્યોર્જ અને કેનિયન મેકડફી સહિતના અન્ય દિગ્ગજ મેદાનમાં છે.
