હોલીવૂડ સાથે સંકળાયેલા ઉચ્ચ વર્ગના લોકોને નશીલા પદાર્થના વેચાણ બદલ ‘કેટામાઇન ક્વીન’ તરીકે ઓળખાતી પંજાબી મૂળની બ્રિટિશ-અમેરિકન ડ્રગ ડીલરને ફ્રેન્ડ્સ સ્ટાર મેથ્યુ પેરીના મોત માટે જવાબદાર કેટામાઇનના વેચાણ બદલ 15 વર્ષની જેલની સજા ફટકારવામાં આવી હતી. અમેરિકા અને બ્રિટન બંનેની નાગરિકતા ધરાવતી 42 વર્ષીય જસવીન સંઘાને 2023માં અભિનેતા મેથ્યુ પેરીના મોતના કેસમાં સંડોવણી બદલ જેલની સજા ફટકારવામાં આવી હતી. કેનેડિયન-અમેરિકન અભિનેતાના મોતના કેસમાં જે પાંચ લોકો સામે આરોપ હતા તેમાં લંડનમાં જન્મેલી અને પંજાબી મૂળની, જસવીન સંઘાનો સમાવેશ થાય છે. મેથ્યુ તેના લોસ એન્જેલસના વૈભવી ઘરના હોટ ટબમાં મૃત હાલતમાં મળી આવ્યો હતો. ફેડરલ પ્રોસીક્યુટર્સે જણાવ્યું હતું કે, સંઘા લોસ એન્જલસમાં તેના એપાર્ટમેન્ટમાંથી મોટાપાયે ડ્રગની હેરાફેરી કરતી હતી, તે અમેરિકાના મનોરંજન ઉદ્યોગના ધનવાન ગ્રાહકોને કેટામાઇન, મેથામ્ફેટામાઇન અને અન્ય નશીલા પદાર્થ પહોંચાડતી હતી. પ્રોસીક્યુટર્સે ડોક્યુમેન્ટ્સમાં જણાવ્યા મુજબ, ‘સંઘાએ પોતાના બિઝનેસને વિકસાવવા માટે હોલીવૂડના હાઇ પ્રોફાઇલ ગ્રાહકોને પોતે ડ્રગ સપ્લાય કરતી હોવાનું જણાવીને પોતાનું ખાસ પ્રકારનું માર્કેટિંગ કરતી હતી. ડોક્યુમેન્ટ્સમાં વધુમાં જણાવ્યું હતું કે, ‘તેણે 2020માં એક ગ્રાહકને કહ્યું હતું કે, ‘હું લોકોને પસંદ કરવામાં સતર્ક રહું છું’ અને ‘તે સેલિબ્રિટીઝનું ખૂબ જ VIP ગ્રુપ છે.’
