અક્ષયકુમારની બહુચર્ચિત ફિલ્મ ‘ભૂત બંગલા’ હવે 17 એપ્રિલે રીલીઝ કરવાની તૈયારીઓ થઇ રહી છે. ફિલ્મના નિર્માતાઓએ હવે ફિલ્મની રિલીઝ યોજનામાં વ્યૂહાત્મક ફેરફાર અને પેઇડ પ્રીવ્યુઝ અંગે સત્તાવાર જાહેરાત કરી છે.
એકતા કપૂર અને અક્ષયકુમાર દ્વારા નિર્મિત આ હોરર-કોમેડી ફિલ્મ હવે મૂળ આયોજન કરતાં એક અઠવાડિયા મોડી રિલીઝ થઇ રહી છે અને એડવાન્સ પેઇડ પ્રીવ્યુઝ 16 એપ્રિલે રાત્રે 9 વાગ્યાથી શરૂ થશે.
આ અંગે એકતા કપૂરે જણાવ્યું હતું કે, ‘અમારા ડિસ્ટ્રિબ્યુશન પાર્ટનર અને મુખ્ય બજારોના એક્ઝિબિટર્સ સાથે વ્યાપક ચર્ચા અને અનેક માગણી મુજબ અમે ‘ભૂત બંગલા’ની રિલીઝ માટે એક અઠવાડિયાનો વધુ સમય લીધો છે. અમે દર્શકોને શ્રેષ્ઠ સિનેમેટિક અનુભવ આપવા માટે પ્રતિબદ્ધ છીએ અને અમને વિશ્વાસ છે કે આ નિર્ણય દર્શકો માટે લાભદાયી રહેશે અને ફિલ્મને મજબૂત સ્થાન મળશે.’ આ મુદ્દાને બોલીવૂડમાં એક ગણતરીપૂર્વક લેવાયેલ નિર્ણય તરીકે જોવામાં આવે છે, જેનો ઉદ્દેશ અનેક ફિલ્મોને યોગ્ય થિયેટ્રિકલ જગ્યા મળે તે સુનિશ્ચિત કરવાનો છે.
તેણે વધુમાં જણાવ્યું હતું કે, ‘ધુરંધરની સીકવલ સુપરડુપર હિટ થઇ રહી છે, જે ડ્યુસર્સ માટે સારા સમાચાર છે. અમારા એક્ઝિબિટર્સને લાગ્યું કે તેને સ્પષ્ટ અને અવરોધર વગર સમય આપવો બોલીવૂડના હિતમાં રહેશે. ભૂત બંગલાને એક અઠવાડિયા માટે આગળ ખસેડીને, અમે ખાતરી કરવા ઇચ્છતા હતા કે બંને ફિલ્મોને થિએટરમાં યોગ્ય સમય મળી રહે,
માર્કેટિંગ પર ફોકસ અને દર્શકોનું ધ્યાન પણ મળે. અમને વિશ્વાસ છે કે આ અભિગમ દરેક માટે ફાયદાકારક છે — ફિલ્મમેકર્સ, એક્ઝિબિટર્સ અને સૌથી મહત્વનું કે, દર્શકો માટે પણ યોગ્ય રહેશે, જેથી તેઓ દરેક ફિલ્મનો અનુભવ કરી શકે.’ પ્રિયદર્શન અને અક્ષયકુમાર અગાઉ પણ સારી ફિલ્મો આપી ચૂક્યા છે. ભૂત બંગલામાં તેમણે ફરી સાથે કામ કર્યું છે. આ ફિલ્મમાં વામિકા ગબ્બી, પરેશ રાવલ, તબ્બુ, રાજપાલ યાદવ, જિશુ સેંગુપ્તા અને મિથિલા પાલકર પણ છે.
