ભારતની નિકાસ એપ્રિલ મહિનામાં 24.22 ટકા વધીને 38.19 બિલિયન ડોલરે પહોંચી છે. પેટ્રોલિયમ પ્રોડક્ટ્સ, ઈલેક્ટ્રોનિક્સ ગુડ્ઝ અને કેમિકલ્સની નોંધપાત્ર નિકાસ થતા કુલ નિકાસ વધી હતી. જોકે બીજી તરફ વ્યાપાર ખાધ (ટ્રેડ ડેફિસિટ) પણ વધીને 20 બિલિયન ડોલર થઈ છે. ભારતના વાણિજ્ય મંત્રાલયે તાજેતરમાં જાહેર કરેલા આંકડા અનુસાર એપ્રિલમાં દેશની આયાત 26.55 ટકા વધીને 58.26 બિલિયન ડોલર થઈ હતી. તેને કારણે ટ્રેડ ડેફિસિટ 20 બિલિયન ડોલર થઈ હતી. ગત વર્ષે એપ્રિલમાં ટ્રેડ ડેફિસિટ 15.29 બિલિયન ડોલર હતી.
ઓઈલની આયાત 81.21 ટકા વધીને 19.5 બિલિયન ડોલર થઈ હતી. કોલસા, કોલસાની ઈંટ વગેરેની આયાત ડબલથી પણ વધુ વધીને 4.8 બિલિયન ડોલર થઈ હતી, જે ગત વર્ષે આ ગાળામાં 2 બિલિયન ડોલર હતી. જોકે ગોલ્ડની આયાત ઘટીને 1.68 બિલિયન ડોલર થઈ હતી, જે ગત વર્ષે એપ્રિલમાં 6.23 બિલિયન ડોલર હતી. એન્જિનિયરિંગ પ્રોડક્ટ્સની નિકાસ 15.38 ટકા વધીને 9.2 બિલિયન થઈ હતી. પેટ્રોલિયમ પ્રોડક્ટ્સની નિકાસ 113.21 ટકા ઉછળીને 7.73 બિલિયન થઈ હતી. જોકે જેમ્સ-જ્વેલરીની નિકાસ 2.11 ટકા ઘટીને 3.3 બિલિયન ડોલર થઈ હતી.
ફેડરેશન ઓફ ઈન્ડિયન એક્સપોર્ટ ઓર્ગેનાઈઝેશન (FIEO) ના પ્રેસિડેન્ટ એ. શક્તિવેલે કહ્યું હતું કે નવા નાણાકીય વર્ષના પ્રથમ મહિનામાં અત્યાર સુધીની સર્વોચ્ચ 38 બિલિયન ડોલરની નિકાસ દર્શાવે છે કે નિકાસ સેક્ટરમાં સતત વૃદ્ધિ થઈ રહી છે. કેટલાક દેશો સાથે થયેલા નવા ફ્રી ટ્રેડ એગ્રીમેન્ટ અને ઘરઆંગણે કંપનીઓ માટે સરકારે લાગુ કરેલી પ્રોડક્શન લિન્ક્ડ ઈન્વેસન્ટિવ (પીએલઆઈ) સ્કીમને કારણે નિકાસને ખાસ્સું બળ મળ્યું છે. ગત વર્ષે સીમાચિહ્નરૂપ નિકાસ થઈ છે તેવી જ રીતે નવા વર્ષમાં પણ નિકાસ વધતી રહેશે તેવી આશા છે તેમ તેમણે કહ્યું હતું.
