બોલીવૂડના જાણીતા અને સફળ દિગ્દર્શકો જેવા કે કરણ જોહર, સંજય લીલા ભણશાળી, રાજામૌલી, નિતેશ તિવારી, અટલી, સિદ્ધાર્થ આનંદ વિવિધ વિષયક ફિલ્મોનું નિર્માણ કરી રહ્યા છે. તેમના ચાહક દર્શકોમાં એ ફિલ્મોની ખૂબ ચર્ચા છે અને તેના રીલીઝ થવાની આતુરતાપૂર્વક રાહ જોઇ રહ્યા છે.
નિતેશ તિવારી
નિતેશ તિવારી લાંબા સમયથી તેમની બે ભાગમાં બની રહેલી ચર્ચાસ્પદ ‘રામાયણ’ નિર્મામ કરી રહ્યા છે. આ દસકાની સૌથી વધુ રાહ જોવાતી ફિલ્મમાં તેમની ફિલ્મોનું નામ છે. તેનો પ્રથમ ભાગ આ વર્ષે દિવાળી પર રિલીઝ થશે. જેમાં રણબીર કપૂર, સાઇ પલ્લવી, રવિ દુબે, સની દેઓલ અને યશ જેવા કલાકારો છે. 2025માં તેની પ્રથમ ઝલક જાહેર કરવામાં આવી છે, તેનાં વીએફએક્સની પણ ઘણી પ્રશંસા થઇ હતી. તેનો બીજો ભાગ 2027ની દિવાળીમાં રિલીઝ થશે.
એસ. એસ. રાજામૌલી
આરઆરઆર અને બાહુબલી જેવી સફળ ફિલ્મો પછી સાઉથ ઇન્ડિયન ફિલ્મકાર એસ. એસ. રાજામૌલીની વારાણસી ફિલ્મની ખૂબ ચર્ચા થઇ રહી છે, જેમાં મહેશ બાબુ, પ્રિયંકા ચોપરા જોનાસ અને પૃથ્વી સુકુમારન મુખ્ય ભૂમિકામાં છે. આ એક્શન એડવેન્ચર ફિલ્મથી પ્રિયંકા બોલીવૂડમાં પરત જઇ રહી છે. અંદાજે રૂ. એક હજાર કરોડના બજેટમાં બની રહેલી આ ફિલ્મ ભારતીય સિનેમાની સૌથી મોટી ફિલ્મ છે, જે 2027ની શરૂઆતમાં રિલીઝ થશે.
સંદીપ રેડ્ડી વાંગા
સંદીપ રેડ્ડી વાંગાની ફિલ્મમાંથી દીપિકાની વિદાય વખતે તેની સ્પિરિટની ઘણી ચર્ચા થઈ હતી. તાજેતરમાં જ આ ફિલ્મમાંથી પ્રભાસ અને તૃપ્તિ ડીમરીનો ફર્સ્ટ લૂક લોંચ કરવામાં આવ્યો છે. તેમાં વિવેક ઓબેરોય, પ્રકાશ રાજ અને કંચના પણ મહત્વની ભૂમિકામાં છે. આ ફિલ્મ 2026માં તેલુગુ, હિન્દી, કન્નડ, મલયાલમ, મેન્ડ્રેઇન, જાપાનીઝ અને કોરિયન ભાષામાં રિલીઝ થશે. વાંગાની 2024ની ફિલ્મ એનિમલની સીક્વલ- એનિમલ પાર્ક પણ તેના પછી શરૂ થઈ રહી છે.
સંજય લીલા ભણશાળી
સંજય લીલા ભણશાળી છેલ્લાં લાંબા સમયથી તેમના ડ્રીમ પ્રોજેક્ટ લવ એન્ડ વૉરમાં વ્યસ્ત છે. જેમાં આલિયા ભટ્ટ, વિકી કૌશલ અને રણબીર કપૂર મુખ્ય પાત્ર ભજવી રહ્યા છે. રણબીર અને આલિયાની આ એકસાથે બીજી ફિલ્મ છે. અગાઉ તેમણે બ્રહ્માશાસ્ત્રમાં સાથે કામ કર્યું હતું. આલિયા અગાઉ ગંગુબાઈ કાઠિયાવાડીમાં સંજય લીલા ભણશાળી સાથે કામ કર્યું હતું અને રણબીરે તો તેની ફિલ્મી કારકિર્દીની શરૂઆતા જ સંજયની સાંવરિયાથી કરી હતી. આ ફિલ્મ ગત વર્ષે રિલીઝ થવાની હતી, પરંતુ તેના શૂટિંગમાં વિલંબ થવાના કારણે તે હવે આ વર્ષે રીલીઝ થશે.
અટલી
જાણીતા દિગ્દર્શક અટલીએ દીપિકા પદુકોણ અને અલ્લુ અર્જૂન સાથે તેમની મહત્વાકાંક્ષી સાયન્સ ફિક્શન ફિલ્મની ગત વર્ષે વેવ્ઝ સમિટમાં જાહેરાત કરી હતી. અલ્લુ અર્જૂને આ ફિલ્મ વિશે કહ્યું હતું, ‘તેમનો આઇડીયા મને બહુ જ ગમ્યો હતો અને મને એની મહત્વકાંક્ષાઓમાં રસ પડ્યો હતો. અમારા વિચારો ઘણા સ્તર પર મળતા હતા. આ ભારતીય લાગણીઓ સાથેની એક ઇન્ટરનેશનલ લેવલની ફિલ્મ હશે.’ આ ફિલ્મનું નિર્માણ કાર્ય થઇ રહ્યું છે અને તે 2027ની શરૂઆતમાં રીલીઝ થઈ શકે છે.
કરણ જોહર
કરણ જોહર દ્વારા બે ફિલ્મનું શૂટિંગ થઇ રહ્યું છે. તે વિવેક સોનીની ચાંદ મેરા દિલ પ્રોડ્યુસ કરે છે, જેમાં લક્ષ્ય અને અનન્યા પાંડે મુખ્ય ભૂમિકામાં છે. આ ફિલ્મ ગત વર્ષે રિલીઝ થવાની હતી, પરંતુ તે હવે આ વર્ષે રીલીઝ થશે. 2026માં કરણ જોહરની ફેન્ટસી કોમેડી નાગઝિલા પણ આવી રહી છે, જેના દિગ્દર્શક મૃઘદીપસિંહ લાંબા છે, જેમાં કાર્તિક આર્યન સાપની ભૂમિકામાં જોવા મળશે. આ ત્રણ ફિલ્મનો પ્રોજેક્ટ છે, જેનો પ્રથમ ભાગ આ વર્ષે ઓગસ્ટમાં રિલીઝ થશે.
સિદ્ધાર્થ આનંદ
સિદ્ધાર્થ આનંદે, શાહરુખ ખાન સાથે પઠાણ જેવી સફળ ફિલ્મ આપી છે, આ ફિલ્મે બોક્સ ઓફિસ પર અનેક રેકોર્ડ તોડીને 1050 કરોડનો બિઝનેસ કર્યો હતો. હવે સિદ્ધાર્થ ફરી એકવાર શાહરુખ સાથે ‘કિંગ’ ફિલ્મ બનાવી રહ્યા છે. જેમાં સુહાના ખાન, દીપિકા પાદુકોણ, જયદીપ આહલાવત, અભિષેક બચ્ચન અને રાઘવ જુયાલ મહત્વની ભૂમિકામાં છે. આ ફિલ્મ આ વર્ષે જ રીલીઝ થશે.
