અમેરિકા અને સીરિયા વચ્ચેની દાયકાઓ જૂની દુશ્મની મિત્રતામાં પલટાઈ જાય તેવી એક મોટી હિલચાલમાં અમેરિકાના પ્રેસિડન્ટ ડોનાલ્ડ ટ્રમ્પ બુધવારે સાઉદી અરેબિયામાં સીરિયાના વચગાળાના પ્રમુખ અહમદ અલ-શરાને મળ્યાં હતાં. 25 વર્ષ પછી બંને દેશોના નેતાઓની આ મુલાકાત દાયકાઓથી આંતરરાષ્ટ્રીય બહિષ્કારમાંથી બહાર આવવા સંઘર્ષ કરી રહેલા સીરિયા માટે ટર્નિંગ પોઇન્ટ બની શકે છે.
અલ-શારા સાથેની મુલાકાત પછી ગલ્ફ કોઓપરેશન કાઉન્સિલને ટ્રમ્પે જણાવ્યું હતું કે હું સીરિયાને નવી શરૂઆત આપવા માટે તેના પરના પ્રતિબંધો હટાવવાનો આદેશ આપી રહ્યો છું. તેનાથી સીરિયાને એક તક મળે છે. અલ-શારાએ અબ્રાહમ કરારમાં જોડાવા અને આખરે ઇઝરાયલને માન્યતા આપવા સંમતિ આપી હતી.
ગલ્ફ કો-ઓપરેશન કાઉન્સિલના નેતાઓ સાથે ટ્રમ્પના મેળાવડા દરમિયાન આ બેઠક યોજાઈ હતી. અસદ પરિવારના 50 વર્ષના લોખંડી શાસન પછી અલ-શારા સીરિયાના પ્રેસિડન્ટ બન્યા છે. અમેરિકાએ સીરિયાના નવા નેતાની ધરપકડ માટે એક સમયે એક કરોડ ડોલરનું ઇનામ જાહેર કર્યું હતું. અલ-શારાના અલ-કાયદા સાથે સંબંધો હતાં અને સીરિયન યુદ્ધમાં જોડાતા પહેલા ઇરાકમાં યુએસ દળો સામે લડતા બળવાખોરો સાથે જોડાયા હતાં. ટ્રમ્પ-શારાની મુલાકાતને પગલે સીરિયાના લોકોએ ફટાકડા ફોડીને ઉજવણી કરી હતી.
