હિન્દુ કાઉન્સિલ (બ્રેન્ટ) દ્વારા 25 જાન્યુઆરી, 2026ના રોજ વેમ્બલીની અલ્પર્ટન કોમ્યુનિટી સ્કૂલ ખાતે ભારતના 77મા પ્રજાસત્તાક દિવસની શાનદાર ઉજવણી કરવામાં આવી હતી, જેમાં સમુદાયના સભ્યો એકતા અને રાષ્ટ્રીય ગૌરવની ભાવના સાથે ભેગા થયા હતા. આ કાર્યક્રમનું આયોજન નિર્મલાબેન પટેલ અને કાઉન્સિલની સમર્પિત સમિતિના નેતૃત્વ હેઠળ કરવામાં આવ્યું હતું.
આ ઉજવણીમાં બ્રેન્ટના મેયર, સંસદ સભ્યો, કાઉન્સિલરો, સમુદાયના નેતાઓ અને યુકેના વસતા ભારતીય મૂળના રહેવાસીઓએ હાજરી આપી હતી. કાર્યક્રમની શરૂઆત દીવા પ્રગટાવીને અને ધ્વજવંદનથી થઈ હતી, ત્યારબાદ દેશભક્તિના ગીતો, સાંસ્કૃતિક નૃત્યો, પ્રસ્તુતિઓ અને ભારતના લોકશાહી મૂલ્યો અને વારસાને ઉજાગર કરતા પ્રેરણાદાયી ભાષણો કરવામાં આવ્યા હતા.
કાર્યક્રમ દરમિયાન, અરવિંદભાઈ ધિતિયા, ઉપેન્દ્રભાઈ સોલંકી અને ભરતભાઈ પટેલને હિન્દુ કાઉન્સિલ (બ્રેન્ટ) પ્રત્યેની તેમની લાંબા સમયથી સેવા અને પ્રતિબદ્ધતા બદલ સન્માનિત કરવામાં આવ્યા હતા.
આ કાર્યક્રમનું સમાપન ડીનર સાથે થયું હતું જેમાં આયોજકોએ કલાકારો, સ્વયંસેવકો, સ્પોન્સરર અને ઉપસ્થિતો સૌનો ઉજવણીને યાદગાર સફળ બનાવવા બદલ આભાર માન્યો હતો.
