ઓસ્ટ્રેલિયાના ક્વીન્સલેન્ડમાં 6 નવેમ્બરે રમાયેલી ચોથી ટી20 ઇન્ટરનેશનલ મેચમાં ભારતે શાનદાર બોલિંગ પ્રદર્શન કરીને ઓસ્ટ્રેલિયાને 48 રને હરાવ્યું હતું. ઓસ્ટ્રેલિયાએ પોતાની છેલ્લી સાત વિકેટ માત્ર 28 રનમાં ગુમાવી દીધી હતી. આ જીતથી ભારત પાંચ મેચની T20I શ્રેણીમાં 2-1થી આગળ રહ્યું હતું. ભારતે પ્રથમ બેટિંગ કરીને ઓસ્ટ્રેલિયાને 168 રનનો ટાર્ગેટ આપ્યો હતો. આની સામે ઓસ્ટ્રેલિયાની ટીમ 18.2 ઓવરમાં 119 રનમાં ઓલઆઉટ થઈ ગઈ હતી.
ભારત તરફથી અક્ષર પટેલ અને શિવમ દુબેએ બે-બે વિકેટ ઝડપી હતી. ભારતના કેપ્ટન સૂર્યકુમાર યાદવે 10 બોલમાં 20 રનની ઇનિંગ રમી હતી અને પછી બોલિંગમાં ફેરફાર અને DRS કોલથી પ્રભાવિત કર્યા હતાં. વોશિંગ્ટન સુંદરે પણ ત્રણ વિકેટ ઝડપી હતી.
મેચમાં ટોસ ઓસ્ટ્રેલિયન કેપ્ટન મિચેલ માર્શે જીત્યો હતો અને તેમણે ટીમ ઈન્ડિયાને પ્રથમ બેટિંગ માટે આમંત્રણ આપ્યું હતું. ભારતે 20 ઓવરમાં 8 વિકેટના નુકસાને 167 રન બનાવીને ઓસ્ટ્રેલિયાને 168 રનનો ટાર્ગેટ આપ્યો હતો. ભારત તરફથી સૌથી વધુ રન ગિલે (46 રન) બનાવ્યા.
આ મેચમાં ભારત તરફથી અભિષેક શર્મા અને શુભમન ગિલ ઓપનિંગ કરવા માટે આવ્યા હતાં. ભારતની શરૂઆત સારી રહી હતી, પરંતુ ટીમને પહેલી જ ઓવરમાં નસીબનો સાથ મળ્યો જ્યારે બેન ડ્વાર્શુઈસના બોલ પર ઝેવિયર બાર્ટલેટે અભિષેક શર્માનો કેચ છોડી દીધો હતો. આ જીવનદાનનો ફાયદો ઉઠાવીને અભિષેકે 26 રનની ઇનિંગ રમી હતી. પરંતુ 7મી ઓવરમાં એડમ ઝમ્પાએ તેની વિકેટ ઝડપી લીધી. 10 ઓવરના અંતે ભારતનો સ્કોર એક વિકેટે 75 રન હતો, જે એક મજબૂત શરૂઆત દર્શાવતો હતો.
ભારતને 12મી ઓવરમાં બીજો ઝટકો લાગ્યો જ્યારે શિવમ દુબે 22 રન બનાવીને આઉટ થયો હતો. ભારતને 15મી ઓવરમાં શુભમન ગિલ 46 રન બનાવીને આઉટ થયો. ભારતને 16મી ઓવરમાં ચોથો ઝટકો લાગ્યો જ્યારે કેપ્ટન સૂર્યા 20 રન બનાવીને આઉટ થયો હતો. 17મી ઓવરમાં તિલક વર્મા 5 રન બનાવીને આઉટ થયો. જીતેશ પણ 3 રન બનાવીને આઉટ થયો. 19મી ઓવરમાં ભારતને સાતમો ઝટકો લાગ્યો જ્યારે સુંદર 12 રન બનાવીને આઉટ થયો હતો.
