ભારત સરકારની રાષ્ટ્રીય કોવિડ-19 સુપરમોડલ કમિટીએ ઓમિક્રોનને લઈને ચેતવણી આપી હતી. કમિટીએ કહ્યું હતું કે, ઓમિક્રોનને કારણે દેશમાં ત્રીજી લહેર આવશે અને આ લહેર ફેબ્રુઆરી મહિનામાં પીક ઉપર હશે.
નેશનલ કોવિડ-19 સુપરમોડલ કમિટીએ આશંકા વ્યક્ત કરી છે કે, દેશમાં વર્ષની શરૂઆતમાં કોરોનાની ત્રીજી લહેર આવી શકે છે. દેશમાં હાલ કોરોનાના દૈનિક કેસોની સંખ્યા 7500ની આસપાસ નોંધાઈ રહી છે, પણ ડેલ્ટા વેરિયન્ટ પર હાવી થતાં ઓમિક્રોનને કારણે દેશમાં કોરોનાના દૈનિક કેસોમાં જોરદાર ઉછાળો આવશે તેવું પણ કમિટી દ્વારા જણાવવામાં આવ્યું હતું.
નેશનલ કોવિડ-19 સુપરમોડલ કમિટીના હેડ વિદ્યાસાગરે જણાવ્યું છે કે, ભારતમાં ઓમિક્રોનને કારણે ત્રીજી વેવ આવશે પણ બીજી લહેર કરતાં તે થોડી નબળી હશે. ભારતમાં આગામી વર્ષની શરૂઆતમાં ત્રીજી વેવ આવવાની સંભાવના છે. અને હાલમાં દેશમાં મોટી સંખ્યામાં લોકોમાં રોગપ્રતિકારક શક્તિ આવી જવાને કારણે બીજી લહેર કરતાં ત્રીજી લહેર પ્રમાણમાં નબળી હશે. પણ ત્રીજી વેવ આવશે તે નક્કી છે. અને એકવાર ઓમિક્રોન દ્વારા ડેલ્ટા વેરિયન્ટને હટાવ્યા બાદ કોરોનાના કેસોમાં ઉછાળો આવશે.
આઈઆઈટી હૈદરાબાદના પ્રોફેસર વિદ્યાસાગરે જણાવ્યું કે, ભારતમાં બીજી વેવની સરખામણીમાં ત્રીજી વેવમાં દૈનિક કેસોમાં ઘટાડો જોવા મળશે. માર્ચ 1ના રોજ જ્યારે ભારત સરકાર દ્વારા રસીકરણ અભિયાન શરૂ કરવામાં આવ્યું હતું, ત્યારે જ ડેલ્ટા વેરિયન્ટની એન્ટ્રી થઈ હતી. એટલે કે, ફ્રન્ટલાઈન વર્કર્સ સિવાયના સામાન્ય લોકો કે જેઓનું રસીકરણ થયું ન હતું, તે લોકોમાં ડેલ્ટા વેરિયન્ટની ગંભીર અસરો જોવા મળી હતી.
આ ઉપરાંત તેઓએ જણાવ્યું કે, સીરો સર્વે અનુસાર હવે ખુબ જ ઓછા લોકો એવા છે કે જેઓ ડેલ્ટા વેરિયન્ટના સંપર્કમાં આવ્યા નથી. અત્યારે 75થી 80 ટકા લોકોમાં સીરો પ્રસાર જોવા મળે છે, 85 ટકા લોકોએ પ્રથમ ડોઝ લઈ લીધો છે, 55 ટકા લોકોએ બંને ડોઝ લીધા છે, અને મહામારી 95 ટકા લોકો સુધી પહોંચી ગઈ છે. એટલે કે ખુબ જ ઓછા લોકો સંક્રમિત થયા નથી. જેને કારણે ત્રીજી વેવમાં બીજી વેવ જેટલાં દૈનિક કેસો જોવા મળશે નહીં. અને હવે આપણે આપણી ક્ષમતા પણ વધારી છે, જેને કારણે આપણે કોઈપણ મુશ્કેલી સામે લડી શકીએ છીએ.
વિદ્યાસાગરે વધુમાં જણાવ્યું હતું કે, ખરાબમાં ખરાબ સ્થિતિમાં પણ ત્રીજી વેવમાં દેશમાં દૈનિક 2 લાખથી વધારે કેસો નહીં હોય. અને આ આંકડા બીજી વેવના પીક કરતાં અડધા છે. આ ઉપરાંત કોવિડ-19 કમિટી પેનલે સંભાવના વ્યક્ત કરી છે કે, ઓમિક્રોનનું કમ્યુનિટી લેવલ પર ટ્રાન્સમિશન શરૂ થઈ ચૂક્યું છે.
