ભારત શુક્રવારે અમેરિકાના નેતૃત્વ હેઠળના વ્યૂહાત્મક જોડાણ પેક્સ સિલિકામાં જોડાયું હતું. આ એલાયન્સનો હેતુ ઉદ્દેશ્ય મહત્વપૂર્ણ ખનિજો અને આર્ટિફિશિયલ ઇન્ટેલિજન્સ (એઆઇ) માટે ચીન પરની નિર્ભરતામાં ઘટાડો કરીને મજબૂત સપ્લાય ચેઇન બનાવવાનો છે.
નવી દિલ્હીમાં એઆઈ ઈમ્પેક્ટ સમિટમાં એક સમારોહ દરમિયાન આ ગઠબંધનમાં જોડાવા અંગેના કરાર પર હસ્તાક્ષર થયા હતાં. આ પ્રસંગે કેન્દ્રીય ઇલેક્ટ્રોનિક્સ અને માહિતી ટેકનોલોજી મંત્રી અશ્વિની વૈષ્ણવ, યુએસ અંડર સેક્રેટરી ઓફ સ્ટેટ ફોર ઇકોનોમિક અફેર્સ જેકબ હેલબર્ગ અને ભારતમાં યુએસ એમ્બેસેડર સર્જિયો ગોર હાજર રહ્યાં હતાં.
સર્જિયો ગોરે જણાવ્યું હતું કે વેપાર કરારથી લઈને પેક્સ સિલિકા અને સંરક્ષણ સહયોગ સુધી, આપણા બંને રાષ્ટ્રો માટે સાથે મળીને કામ કરવાની સંભાવના ખરેખર અમર્યાદિત છે. પેક્સ સિલિકામાં ભારતનો પ્રવેશ માત્ર એક પ્રતીકાત્મક પગલું નથી, પરંતુ એક વ્યૂહાત્મક પગલું છે, જે દ્વિપક્ષીય સંબંધોના એકંદર માર્ગને વધુ મજબૂત બનાવશે. ભારત એક એવો દેશ છે જેમાં વિપુલ પ્રતિભા છે, જે પડકારોને ટક્કર આપી શકે તેટલી ગહનછે. ભારતની એન્જિનિયરિંગ ક્ષમતા આ મહત્વપૂર્ણ ગઠબંધન માટે મહત્વપૂર્ણ ક્ષમતાઓ પ્રદાન કરે છે. ભારતે મહત્વપૂર્ણ ખનિજ પ્રોસેસ ક્ષમતા માટે મોટી પ્રગતિ કરી છે. અમેરિકા પેક્સ સિલિકા ફ્રેમવર્ક હેઠળ ભારત સાથે વિશ્વસનીય AI ટેકનોલોજી શેર કરી શકે છે.
યુએસ અંડર સેક્રેટરી હેલબર્ગે ગઠબંધનમાં જોડાવાના ભારતના નિર્ણયની પ્રશંસા કરતાં જણાવ્યું હતું કે આપણે જોઈએ છીએ કે આપણા મિત્રો અને સાથી દેશો દરરોજ આર્થિક બળજબરી અને બ્લેકમેલના જોખમોનો સામનો કરી રહ્યા છે. તેમને તેમની સાર્વભૌમત્વ અને તેમની સમૃદ્ધિ વચ્ચે પસંદગી કરવાની ફરજ પાડવામાં આવે છે. આપણે વૈશ્વિક સપ્લાય ચેઇન સાથે ઝઝૂમી રહ્યાં છીએ જે ખૂબ જ વધુ પડતી કેન્દ્રિત છે.
મહત્વપૂર્ણ ખનિજો અને આર્ટિફિશિયલ ઇન્ટેલિજન્સ માટે સુરક્ષિત, મજબૂત અને નવીનતા-સંચાલિત સપ્લાય ચેઇન બનાવવા માટે ડિસેમ્બરમાં આ એલાયન્સની જાહેરાત કરાઈ હતી. 12 ડિસેમ્બરના રોજ વોશિંગ્ટનમાં પેક્સ સિલિકા સમિટ યોજાઈ હતી જ્યાં ભાગીદાર રાષ્ટ્રોએ પેક્સ સિલિકા ઘોષણાપત્ર પર હસ્તાક્ષર કર્યા હતા.પેક્સ સિલિકાના સભ્ય દેશોમાં ઓસ્ટ્રેલિયા, ગ્રીસ, ઇઝરાયલ, જાપાન, કતાર, કોરિયા પ્રજાસત્તાક, સિંગાપોર, સંયુક્ત આરબ અમીરાત અને યુનાઇટેડ કિંગડમનો સમાવેશ થાય છે.
