નવી દિલ્હીના ભારત મંડપમ ખાતે ચાલી રહેલી વિશ્વની સૌથી મોટી એઆઇ સમીટમાં શુક્રવારે ઇન્ડિયાયુથ કોંગ્રેસના કાર્યકારો સુરક્ષા કોર્ડન તોડીને સંકુલમાં ઘુસી ગયાં હતાં અને ભારે હોબાળો કર્યો હતો. દેખાવકારોએ પોતાના ટી-શર્ટ કાઢીને વડાપ્રધાન નરેન્દ્ર મોદી વિરુદ્ધ આક્રમક સૂત્રોચ્ચાર કર્યા હતાં.
આ સમીટમાં દેશ-વિદેશના અનેક દિગ્ગજો અને પ્રતિનિધિઓ હાજર હતાં ત્યારે યુથ કોંગ્રેસના કાર્યકારોએ આવા દેખાવો કરતાં તેની ભાજપે આકરી પ્રતિક્રિયા આપીને તેને દેશની છબી ખરડવાનો પ્રયાસ ગણાવ્યો હતો.પોલીસે સમીટના સ્થળે દેખાવો કરી રહેલા 10 લોકોને અટકાયતમાં લીધા હતાં.
ભાજપના નેતા અમિત માલવિયાએ કહ્યું હતું કે ભારત એક પ્રતિષ્ઠિત વૈશ્વિક AI સમિટનું આયોજન કરી રહ્યું છે, ત્યારે કોંગ્રેસ પાર્ટીએ દેશના ગૌરવ કરતાં ભાંગફોડને વધુ મહત્ત્વ આપ્યું હતું. ભાજપના રાષ્ટ્રીય પ્રવક્તા પ્રદીપ ભંડારીએ X પર લખ્યું હતું કે કોંગ્રેસ પાર્ટીને શરમ આવવી જોઇએ. કોંગ્રેસ શહેરી નક્સલીઓની જેમ વર્તે છે. કોંગ્રેસ ભારત વિરોધી પાર્ટી છે. યુથ કોંગ્રેસના કાર્યકરોએ રાહુલ ગાંધીના ઇશારા પર વાંધાજનક સૂત્રોચ્ચાર કર્યા હતાં.
