ભારતમાં અફીણના સૌથી વધુ વ્યસની લોકો છે. આવનારા સમયમાં તેના પૂરવઠામાં વધારો થવાની પણ શક્યતા છે. કારણ કે અફઘાનિસ્તાનમાંથી અફીણની હેરફેર વધી રહી છે. તાજેતરમાં જાહેર કરાયેલા યુએન ઓફિસ ઓન ડ્રગ્સ એન્ડ ક્રાઇમ્સ (UNODC) વર્લ્ડ ડ્રગ રિપોર્ટ ૨૦૨૨માં જણાવ્યા અનુસાર ૧૫-૬૪ વર્ષના લગભગ ૨૮.૪ કરોડ લોકોએ ૨૦૨૦માં વિશ્વભરમાં ડ્રગ્સનો વપરાશ કર્યો હતો. તે અગાઉના દાયકાની તુલનામાં ૨૬ ટકા વૃદ્ધિ દર્શાવે છે. અહેવાલમાં જણાવાયું છે કે, વિશ્વભરમાં ૧.૧૨ કરોડ લોકો ઇન્જેક્શન દ્વારા ડ્રગ્સનું સેવન કરી રહ્યા છે. અહેવાલમાં જણાવ્યા અનુસાર “ભારત વપરાશકારોની રીતે વિશ્વનું સૌથી મોટું અફીણ માર્કેટ છે. અફઘાનિસ્તાનમાંથી પૂર્વના દેશો તરફ અફીણની હેરફેર વધી રહી હોવાના સંકેત છે. તેને લીધે આગામી સમયમાં ભારતમાં અફીણનો સપ્લાય વધવાની આશંકા છે અને તેથી અફીણની દાણચોરી તેમજ તેની સાથે સંકળાયેલા ગુનાઓમાં વધારો થઈ શકે. ઉપરાંત, અફીણની ઉપલબ્ધતા વધવાથી હેરોઇનના ઓવરડોઝમાં પણ વધારો થઈ શકે.”
જોકે, અહેવાલમાં ભારતમાં ડ્રગ્સનું સેવન કરતા લોકોના આંકડા અપાયા નથી. સંયુક્ત રાષ્ટ્રના અહેવાલમાં જણાવ્યા અનુસાર ‘૨૦૨૦માં ભારત ૫.૨ ટન અફીણના જથ્થાની જપ્તી સાથે ચોથા ક્રમે હતું. ઉપરાંત, દેશમાંથી ૦.૭ ટન મોરફીન પણ પકડાયું હતું, જે વિશ્વમાં ત્રીજા ક્રમે હતું. દેશમાંથી ૩.૮ ટન હેરોઇન પણ પકડાયું હતું, જે વિશ્વમાં પાંચમા નંબરે હતું.’
અહેવાલમાં જણાવ્યા અનુસાર “૨૦૨૦માં એશિયાના નવ દેશમાંથી ટ્રેમાડોલનો કુલ ૧.૨ ટન જથ્થો પકડાયો હતો. જેમાં ભારતનો હિસ્સો ૩૯ કિગ્રા હતો. ૨૦૧૯માં ભારતમાંથી ૧૪૪ કિગ્રા જથ્થો પકડાયો હતો. જ્યારે અન્ય છ દેશોની કુલ જપ્તી ૭૦ કિગ્રા હતી.” ૨૦૨૦માં ભારતીય સત્તાવાળાએ પહેલી વખત નોન-મેડિકલ ટ્રેમાડોલ અને અન્ય ડ્રગ્સની હેરાફેરી કરતા ક્રિમિનલ નેટવર્કને પકડી પાડ્યું હતું. અહેવાલમાં જણાવ્યા અનુસાર ૨૦૨૦માં વિશ્વમાં કોકેઇનનું ઉત્પાદન રેકોર્ડ ઊંચાઇએ પહોંચ્યું હતું.
