લોસ એન્જલસની એક ફેડરલ કોર્ટે બુધવાર, 8 એપ્રિલે ‘ફ્રેન્ડ્સ’ ટીવી શોના સ્ટાર મેથ્યુ પેરીને ડ્રગ સપ્લાય કરનારી ભારતીય મૂળની બ્રિટિશ અમેરિકન ડ્રગ ડિલર મહિલાને 15 વર્ષની જેલની સજા ફટકારી હતી. હોલિવૂડની સેલિબ્રિટીને માદક પદાર્થોના સપ્લાય માટે ‘કેટામાઇન ક્વિન’ તરીકે કુખ્યાત બનેલ 42 વર્ષીય જસવીન સંઘાએ મેથ્યુને ડ્રગ્સ સપ્લાય કર્યો હોવાનો આરોપ હતો. મેથ્યુ પેરીનું 2023માં ડ્રગ્સના ઓવરડોઝને કારણે મોત થયું હતું.
જસવીન સંઘા બ્રિટનમાં 1983માં પંજાબી પરિવારમાં જન્મી હતી. અમેરિકા અને બ્રિટનની બેવડી નાગરિકતા ધરાવતી જસવીન હોલીવુડની હાઇ પ્રોફાઇલ સેલિબ્રિટીઓને ડ્રગ્સ પૂરા પાડતી હતી. તે પોતાને ‘VIP સેલિબ્રિટીઝ’ માટેની ‘સ્પેશિયલ ડીલર’ તરીકે ઓળખાવતી હતી.
ફેડરલ પ્રોસિક્યુટર્સે જણાવ્યું હતું કે સંઘા લોસ એન્જલસમાં તેના વૈભવી એપાર્ટમેન્ટમાંથી મોટા પાયે ડ્રગ ઓપરેશન ચલાવતી હતી અને અમેરિકાના મનોરંજન ઉદ્યોગના શ્રીમંત ગ્રાહકોને કેટામાઇન, મેથામ્ફેટામાઇન અને અન્ય માદક દ્રવ્યોનો સપ્લાય કરતી હતી. પોતાના વ્યવસાયને વિકસાવવા માટે સંઘાએ પોતાને એક વિશિષ્ટ ડીલર તરીકે માર્કેટિંગ કર્યું જે હાઇ-પ્રોફાઇલ હોલીવુડ ગ્રાહકોને સેવા આપતી હતી.
શો ‘ફ્રેન્ડ્સ’માં ચાન્ડલર બિંગની ભૂમિકા ભજવતો મેથ્યુ પેરી લાંબા સમયથી ડ્રગ્સના વ્યસન સામે લડી રહ્યો હતો. ઓક્ટોબર, 2023માં લોસ એન્જલસ ઘરના હોટ ટબમાં તેનો મૃતદેહ મળી આવ્યો હતો. તપાસમાં જણાયું હતું કે કેટામાઇનના ઓવરડોઝને કારણે તેનું મૃત્યુ થયું હતું.
જસવીન સંઘાએ મેથ્યુના મૃત્યુના ચાર દિવસ પહેલાં તેને (તેના અંગત સહાયક મારફતે) $6,000 માં કેટામાઇનની 25 બોટલો વેચી હતી. તેના ઘરે દરોડા દરમિયાન પોલીસને કેટામાઇનની 79 બોટલો, મેથામ્ફેટામાઇનની હજારો ગોળીઓ અને કોકેન મળી આવ્યા હતાં.
