ભારતીય ક્રિકેટ બોર્ડે શ્રીલંકા સામેની આ મહિનામાં રમાનારી ત્રણ ટી-20 અને પછી ત્રણ વન-ડે ઈન્ટરનેશનલ મેચની સીરીઝમાં સુકાનીપદ બે અલગ-અલગ ખેલાડીઓને સોંપ્યું છે, તો બન્ને ફોરમેટ માટેની ટીમમાં પણ કેટલાક અલગ-અલગ પ્લેયર્સની પસંદગી કરી છે. મંગળવારથી શરૂ થતી ત્રણ ટી-20 મેચ માટે ઓલરાઉન્ડર હાર્દિક પંડ્યાની સુકાનીપદે પસંદગી કરાઈ છે, તો એ પછી રમાનારી ત્રણ વન-ડેની સીરીઝ માટે રોહિત શર્મા ટીમનો સુકાની રહેશે.
ટી-20 સીરીઝમાં સૂર્યકુમાર યાદવને ઉપ-સુકાની જાહેર કરવામાં આવ્યો છે. ટી-20 સીરીઝમાં રોહિત શર્મા, કે. એલ. રાહુલ, ઋષભ પંત, રવિન્દ્ર જાડેજા, જસપ્રિત બુમરાહનો પણ સમાવેશ કરાયો નથી, તો ત્રણ નવા ચહેરા – શિવમ માવી, રાહુલ ત્રિપાઠી અને મુકેશ કુમારનો સમાવેશ કરાયો છે.
તો વન-ડે સીરીઝમાં હાર્દિક પંડ્યા વાઈસ કેપ્ટન તરીકે પસંદ કરાયો છે. રવિન્દ્ર જાડેજા તથા બુમરાહનો આ ફોર્મેટમાં પણ સમાવેશ કરાયો નથી, તેના આધારે એવું જણાય છે કે, બન્ને માટેનો વર્કલોડ નિયંત્રિત કરવાની વ્યૂહરચના અપનાવાઈ હોય તેવી શક્યતા છે.
ત્રણ ટી-20ની ટીમઃ હાર્દિક પંડ્યા (સુકાની), સૂર્યકુમાર યાદવ (ઉપસુકાની), ઈશાન કિશન, ઋતુરાજ ગાયકવાડ, શુભમન ગિલ, દીપક હુડા, રાહુલ ત્રિપાઠી, સંજુ સેમસન, વોશિંગ્ટન સુંદર, યુઝવેન્દ્ર ચહલ, અક્ષર પટેલ, અર્શદીપ સિંહ, હર્ષલ પટેલ, ઉમરાન મલિક, શિવમ માવી અને મુકેશ કુમાર.
વન-ડે સીરીઝ માટે ટીમઃ રોહિત શર્મા (સુકાની), હાર્દિક પંડ્યા (ઉપસુકાની), શુભમન ગિલ, વિરાટ કોહલી, સૂર્યકુમાર યાદવ, શ્રેયસ ઐયર, કે. એલ. રાહુલ (વિકેટકીપર), ઈશાન કિશન (વિકેટકીપર), વોશિંગ્ટન સુંદર, યુઝવેન્દ્ર ચહલ, કુલદીપ યાદવ, અક્ષર પટેલ, મોહમ્મદ શમી, મોહમ્મદ સિરાજ, ઉમરાન મલિક અને અર્શદીપ સિંહ.
