લંડન સ્કૂલ ઓફ ઇકોનોમિક્સ એન્ડ પોલિટિકલ સાયન્સ (LSE) એ 28 જાન્યુઆરીના રોજ લંડનમાં આયોજિત એક કાર્યક્રમમાં લોર્ડ મેઘનાદ દેસાઈના જીવન અને વારસાને યાદગાર બનાવવા ‘લોર્ડ દેસાઈ મેમોરિયલ લેક્ચર અને સ્ટુડન્ટ સપોર્ટ ફંડ’નું સત્તાવાર લોન્ચીંગ કર્યું હતું.
જુલાઈ 2025માં 85 વર્ષની વયે અવસાન પામેલા લોર્ડ દેસાઈ યુકેના અગ્રણી અર્થશાસ્ત્રી, લેખક અને બૌદ્ધિક હતા, અને પાંચ દાયકા કરતા વધુ સમય સુધી LSE સમુદાયના પ્રિય સભ્ય હતા. તેઓ 1965માં LSE માં લેક્ચરર તરીકે જોડાયા હતા અને અર્થશાસ્ત્રના પ્રોફેસર બન્યા હતા. તેમણે LSEમાં અર્થશાસ્ત્ર વિભાગના કન્વીનર અને સેન્ટર ફોર ધ સ્ટડી ઓફ ગ્લોબલ ગવર્નન્સના સ્થાપક સહિત અનેક વરિષ્ઠ શૈક્ષણિક ભૂમિકાઓમાં સેવા આપી હતી.
LSE ના પ્રમુખ અને વાઇસ ચાન્સેલર પ્રોફેસર લેરી ક્રેમરે લોર્ડ દેસાઈ સ્ટુડન્ટ સપોર્ટ ફંડ શરૂ કરીને આ કાર્યક્રમની શરૂઆત કરી હતી. આ ફંડ એવા વિદ્યાર્થીઓને ટેકો આપશે જેમનું કાર્ય દેસાઈના બૌદ્ધિક સ્વતંત્રતા, વૈશ્વિક જોડાણ અને સામાજિક પ્રભાવના મૂલ્યોને પ્રતિબિંબિત કરે છે. પ્રોફેસર ક્રેમરે લોર્ડ દેસાઈને પરિવર્તન માટે ઉત્પ્રેરક તરીકે વર્ણવ્યા હતા જેમણે વિદ્યાર્થીઓની પેઢીઓને વિવેચનાત્મક રીતે વિચારવા, હિંમતભેર દલીલ કરવા અને જટિલતાને સ્વીકારવા પ્રેરણા આપી હતી.
‘’પાવર એન્ડ પ્રોફિટ: સ્ટ્રેસીસ એન્ડ ફ્યુચર ઓફ માર્કેટ ઇકોનોમિક્સ’’ શીર્ષક હેઠળના આ સ્મારક વ્યાખ્યાનમાં પ્રોફેસર મેરી કાલ્ડોરની અધ્યક્ષતામાં વૈશ્વિક બજાર પ્રણાલીઓનો સામનો કરી રહેલા પડકારો પર અગ્રણી વિચારકો મોન્ટેક સિંહ આહલુવાલિયા, પ્રોફેસર સર ડેવિડ હેન્ડ્રી, પ્રોફેસર સ્ટીફન નિકેલ અને LSEના ફ્રાન્સેસ્કો કેસેલીએ ચર્ચા કરી હતી.
શ્રદ્ધાંજલિમાં લોર્ડ દેસાઈની હૂંફ, બુદ્ધિ અને વિદ્યાર્થીઓને માર્ગદર્શન આપવા માટેની પ્રતિબદ્ધતા તેમજ જાહેર જીવન, સાંસ્કૃતિક રાજદ્વારી અને ભારત-યુકે સંબંધોને મજબૂત બનાવવામાં તેમના યોગદાન પર પ્રકાશ પાડવામાં આવ્યો હતો. ફંડના સમર્થકોએ કહ્યું કે તે એક એવા વિદ્વાનને યોગ્ય શ્રદ્ધાંજલિ છે જેનો પ્રભાવ વિચારકોની પેઢીઓને આકાર આપી રહ્યો છે.
