મોના સિંહ વિવિધ વેબ સીરિઝ જુદી જુદી ભૂમિકા ભજવી રહી છે. ટૂંક સમયમાં તે કોહરાની બીજી સીઝનમાં એક પોલીસ અધિકારીની ભૂમિકામાં જોવા મળશે. જેમાં તે અંગત સમસ્યાઓ સાથે એક મહિલાની હત્યાના કેસની તપાસ કરી રહી છે.
તાજેતરમાં તેણે એક મીડિયા ઇન્ટરવ્યૂમાં બોલીવૂડમાં મહિલા અને પુરુષ કલાકારો વચ્ચેના ભેદભાવ અંગે ચિંતા વ્યક્ત કરી હતી. તેણે 40 વર્ષની ઉંમરે પણ 50 કે 60 વર્ષની ઉંમરના પાત્રો ભજવવા વિશે વાત કરી હતી. તે કહે છે કે, ‘મેં મારી ઓનસ્ક્રીન ઉંમર વિશે ક્યારેય ચિંતા કરી નથી. મેં એ વિશે ક્યારેય નથી વિચાર્યું કારણ કે મારામાં વિશ્વાસ છે અને હું જાણું છું કે હું કોણ છું. હું કોઈની સામે કંઈ જ સાબિત કરવા ઇચ્છતી નથી તેથી હું જોખમ ખેડું છું. લોકો મને ઘણી વખત પૂછે છે, ‘તું સ્ક્રીન પર આટલી વૃદ્ધ કેમ દેખાય છે? હું કહું છું, શું ફેર પડે છે. એ માત્ર એક પાત્ર છે અને એમાં મને મજા આવે છે.’
તેણે બોલીવૂડમાં સ્ત્રીઓ અને પુરુષોની ઉમર સાથે અલગ વર્તન વ્યવહાર વિશે પણ વાત કરી હતી. તેણે જણાવ્યું, ‘બોલીવૂડમાં માત્ર મહિલાઓ જ એક્સ્પાયરી ડેટ્સ સાથે આવે છે અને એ ઘણી દુઃખની વાત છે. જ્યારે પુરુષ કલાકારો તો 60એ પહોંચીને પણ રોમેન્ટિક રોલ કરતા જોવા મળે છે, પણ મહિલાઓને એવું કામ નથી મળતું. પરંતુ મારે એવું કશું બનવું નથી, તેથી મને તેની કોઈ ચિંતા નથી.’
