કોરોના મહામારીથી બહાર આવવા માટે સૌથી સ્પષ્ટ અને સૌથી મહત્ત્વકાંક્ષી ઇનોવેટિવ આઇડિયાનો અમલ કરનારા વિશ્વભરના શહેરોનું બહુમાન કરતી એક પ્રતિષ્ઠિત સ્પર્ધામાં ભારતનું ઔદ્યોગિક શહેર રૂરકેલા વિજયી બન્યું છે. આ વૈશ્વિક ઇનોવેશન સ્પર્ધામાં 13 દેશોના 15 શહેરો વિજેતા બન્યા છે.
બ્લૂમબર્ગ ફિલાન્થ્રોપીએ મંગળવારે 2021-22 ગ્લોબલ મેયર્સ ચેલેન્ડના 15 વિજેતા શહેરોનો નામ જાહેર કર્યા છે. ગ્લોબલય મેયર્સ ચેલેન્જ વૈશ્વિક ઇનોવેશન સ્પર્ધાની પાંચમી એડિશન હતી. આ સ્પર્ધામાં શહેરોના આશાસ્પદ આઇડિયાને સપોર્ટ કરવામાં આવે છે અને તેનો ફેલાવો કરવામાં આવે છે.
આ સ્પર્ધામાં 99 દેશોના 631 શહેરોએ ભાગ લીધો હતો. બ્લૂમબર્ગ ફિલાન્થ્રોપીની યાદીમાં જણાવ્યા અનુસાર મહિલા ફૂડ વેન્ડરના સશક્તિકરણ, ફૂડ વેસ્ટમાં ઘટાડો અને તાજા ફૂડની ઉપલબ્ધતા માટે મહિલા સહકારી સંસ્થાઓને કોલ્ડ સ્ટોરેજ યુનિટ પૂરા પાડવા બદલ ઓડિશાના રૂરકેલાનું બહુમાન કરવામાં આવ્યું હતું. દરેક વિજેતા શહેરોને 10 લાખ ડોલરનું ઇનામ અને ઘણા વર્ષો સુધીનો ટેકનિકલ સપોર્ટ મળશે. બીજા વિજેતા શહેરોમાં અમ્માન (જોર્ડન), બોગોટો (કોલંબિયા), બુટુઆન (ફિલિપાઇન્સ), ફ્રીટાઉન (સિયેરા લીઓની), હર્મોસિલ્લો (મેક્સિકો), ઇસ્તંબુલ (તૂર્કી), કિગાલી (રવાન્ડા), કુમાસી (ઘાના), પેટરસન (યુએસ), ફિનિક્સ (યુએસ), રોચેસ્ટર (યુએસ), રોટર્ડેમ (નેધરલેન્ડ), વેલિંગ્ટન (ન્યૂઝિલેન્ડ)નો સમાવેશ થાય છે.
બ્લૂમબર્ગ ફિલાન્થ્રોપીના સ્થાપક માઇકલ આર બ્લૂમબર્ગે જણાવ્યું હતું કે હાલની મહામારીથી જાહેર આરોગ્ય અને આર્થિક અસરોનો સામનો કરવાની વિશ્વ મથામણ કરી રહ્યું છે, ત્યારે શહેરો રાષ્ટ્રીય સરકારો કરતાં વધુ ઝડપથી ઇનોવેટિવ આઇડિયાનો અમલ કરી શકે છે. અમારા 15 વિજેતા આરોગ્યમાં સુધારો, બેરોજગારીમાં ઘટાડો, મહિલાઓના સશક્તિકરણ અને બીજા મુદ્દા અંગે નીડર અને હાંસલ કરી શકાય તેવી યોજનાઓ ઓફર કરી છે. આ ઇનોવેટિવ યોજનાઓથી લાખ્ખો શહેરવાસીઓના જીવનમાં સુધારો થશે અને સૌથી સફળ આઇડિયાનો અમલ કરવામાં વિશ્વભરના શહેરોને પ્રેરણા મળશે.
વિજેતા શહેરો હવે 10 લાખ ડોલરની ગ્રાન્ટ અને મજબૂત ટેકનિકલ સહાય સાથે ત્રણ વર્ષના અમલીકરણ સમયગાળામાં પ્રવેશ કરશે. આ સમયગાળામાં આ શહેરો તેમના આઇડિયાના સુધારો કરીને તેનો વ્યાપ વધારશે. આ શહેરો વિશ્વના બીજા શહેરોને પોતાનો આઇડિયા આપવા માટે પણ કામગીરી કરશે. વિજેતા આઇડિયા મુખ્ય મુદ્દામાંથી એક કે વધુનો ઉકેલ રજૂ કરે છે.
