યુક્રેન યુદ્ધ વચ્ચે રશિયાએ પરમાણુ યુદ્ધની ચેતવણી આપતાં જણાવ્યું છે કે ત્રીજા વિશ્વયુદ્ધનો ખતરો વાસ્તવિક છે. યુદ્ધગ્રસ્ત યુક્રેનને શસ્ત્રો આપવા માટે અમેરિકા અને સહયોગી દેશો મંગળવારે બેઠક યોજી રહ્યાં છે તે પહેલા રશિયાએ અણુ યુદ્ધની આ વોર્નિંગ આપી છે. રશિયાના આક્રમણને પગલે પશ્ચિમ દેશો યુક્રેનને શસ્ત્રો પૂરા પાડી રહ્યાં છે, જેથી યુક્રેન આ યુદ્ધમાં રશિયાની લશ્કરી દળોનો સામનો કરી શકે.
જોકે પશ્ચિમ દેશો આ યુદ્ધમાં સીધી રીતે સામેલ થવા માગતા નથી, કારણ કે તેનાથી પરમાણુ શસ્ત્રોથી સજ્જ રશિયા સાથે યુદ્ધ થઈ શકે છે. રશિયાની ન્યૂઝ એજન્સી મારફત પશ્ચિમી દેશોને ચેતવણી આપતા રશિયાના વિદેશ પ્રધાન સર્ગેઇ લાવરોવે જણાવ્યું હતું કે ત્રીજા વિશ્વયુદ્ધનો ખતરો વાસ્તવિક અને ગંભીર પણ છે. તેમણે જણાવ્યું હતું કે આ જોખમ વાસ્તવિક છે, તમે તેની કોઇપણ રીતે અવગણના કરી શકો નહી. આની સાથે શાંતિ મંત્રણા અંગે યુક્રેનના વલણની તેમણે ટીકા કરી હતી. તેમણે દાવો કર્યો હતો કે યુક્રેન ત્રીજા વિશ્વયુદ્ધ માટે દુનિયાના દેશોને ઉશ્કેરી રહ્યું છે. આવી સ્થિતિમાં પરમાણુ યુદ્ધના જોખમને ઓછું આંકી શકાય નહીં. યુક્રેનને શસ્ત્રો આપી રહેલાં પશ્ચિમી દેશો અને નાટો રશિયા સામે પરોક્ષ રીતે યુદ્ધ લડી રહ્યાં છે.
યુક્રેન યુદ્ધને આશરે બે મહિના પૂરા થયા છે. રશિયાના લશ્કરી દળો હવે પૂર્વ યુક્રેનને લક્ષ્યાંક બનાવી રહ્યા છે. પૂર્વ યુક્રેનમાં હવાઇ હુમલાની સાથે મિસાઇલ હુમલા પણ થઈ રહ્યાં છે.
રશિયાના વિદેશ મંત્રાલયની વેબસાઇટમાં જણાવ્યા અનુસાર લાવરોવે એક ઇન્ટરવ્યૂમાં કહ્યું હતું કે નાટો મિલિટરી શસ્ત્રો પૂરા પાડીને આગમાં ધી હોમી રહ્યું છે. એવું લાગે છે કે પશ્ચિમ દેશો યુક્રેન યુદ્ધ ચાલુ રહે તેવું ઇચ્છે છે. યુક્રેનના નેતાઓ નાટોને યુદ્ઘમાં સામેલ થવાની વિનંતી કરીને રશિયાને ઉશ્કેરી રહ્યાં છે. તેમણે જણાવ્યું હતું કે નાટો આડકતરી રીતે યુદ્ધમાં સામેલ છે અને પડદા પાછળથી શસ્ત્રો પૂરા પાડી રહ્યું છે. હાલમાં દરેક જણાવે છે કે આપણે ત્રીજા વિશ્વયુદ્ધને થવા દેવું જોઇએ નહીં.
રશિયાના વિદેશપ્રધાનના નિવેદનના જવાબમાં યુક્રેનના વિદેશ પ્રધાન દિમિત્રો કુલેબાએ જણાવ્યું હતું કે રશિયા અમારા દેશની સમર્થન કરી રહેલી દુનિયાને ડરાવવાની છેલ્લી આશા પણ ખોઇ બેઠું છે. તેથી ત્રીજા વિશ્વયુદ્ધની વાતો કરી રહ્યું છે. આનો અર્થ એવો થાય છે કે યુક્રેનમાં રશિયાને હારના સંકેત મળી ગયા છે.
ક્રેમિન્ના પર રશિયાનો કબજો
બ્રિટનના સંરક્ષણ મંત્રાલયે જણાવ્યું હતું કે યુક્રેનના શહેર ક્રેમિન્ના પર રશિયાના લશ્કરી દળોએ કબજો કર્યો છે. બ્રિટનના સંરક્ષણ મંત્રાલયે મંગળવારે ટ્વીટ કરીને જણાવ્યું હતું કે ક્રેમિન્ના પર કબજાના અહેવાલ છે અને ઇજિયમમાં ખુંખાર યુદ્ધ ચાલી રહ્યું છે. રશિયાના લશ્કરી દળો સ્લોવિયાંસ્ક અને ક્રોમટોરસ્ક તરફ આગળ વધી રહ્યાં છે. ક્રેમિન્ના યુક્રેનની રાજધાની કીવથી 575 કિલોમીટર દૂર છે. બીજી તરફ રશિયાના સંરક્ષણ મંત્રાલયે જણાવ્યું હતું કે યુક્રેનના સાત પોર્ટ પર 18 દેશોના 76 જહાજોને રોકવામાં આવ્યા છે.
યુએનના વડાએ યુદ્ધવિરામની અપીલ કરી
સંયુક્ત રાષ્ટ્રસંઘના વડા એન્ટોનિયો ગુટેરસે મંગળવારે મોસ્કોમાં રશિયાના વિદેશ પ્રધાન સર્ગેઇ લાવરોવ સાથે બેઠક કરી હતી અને યુક્રેનમાં યુદ્ધવિરામની અપીલ કરી હતી. ગુટેરસે જણાવ્યું હતું કે યુક્રેન યુદ્ધથી વિશ્વના જુદા જુદા દેશોમાં અનાજ સુરક્ષાને અસર થઈ રહી છે અને તેઓ તેમાં ઘટાડો કરવા માગે છે. યુએનના મહાસચિવ આ સપ્તાહે યુક્રેનની રાજધાની કીવની પણ મુલાકાત લેશે.
