બોલીવૂડના એક્ટર સંજય દત્તને ફેંફસાનું કેન્સર થયું હોવાની વિગતો સામે આવી છે. મંગળવારે રાત્રે તેમને કેન્સર થયું હોવાની વાત વાયુ વેગે પ્રસરી હતી અને તેને પગલે સંજૂ બાબાના ફેન્સ પણ ઉદાસ થઈ ગયા હતા. સંજય દત્તે મગંળવારે એક ટ્વીટ સંદેશમાં જણાવ્યું હતું કે તે મેડિકલ સારવાર માટે થોડા દિવસ માટે કામમાંથી બ્રેક લઈ રહ્યા છે અને તેઓ જલ્દીથી પરત ફરશે. સંજય દત્તને ફેંફસાનું થર્ડ સ્ટેજનું કેન્સર હોવાનું જણાતા તે અમેરિકા સારવાર માટે જવાનો છે.
બુધવારે સંજય દત્તની પત્ની માન્યતાએ સત્તાવાર રીતે પોતાનું નિવેદન જાહેર કર્યું છે. માન્યતાએ સંજય દત્તાના ફેન્સ અને શુભચિંતકોનો આભાર વ્યક્ત કર્યો છે. સંજય દત્તને કેન્સર હોવાની જાણ થતા જ તેના લાખો ફેન્સે તેમને જલ્દીથી સાજા થવા માટે શુભેચ્છાઓ પાઠવી હતી. માન્યતાએ નિવેદનમાં જણાવ્યું કે, હું તમારા બધાનો ધન્યવાદ માનું છું જેમણે સંજૂને જલ્દી સાજા થવાની કામના કરી છે. આ સમયને પસાર કરવા માટે સંપૂર્ણ શક્તિ અને પ્રાર્થાની જરૂર છે. પરિવાર વિતેલા વર્ષમાં પણ ઘણી મુશ્કેલીમાંથી પસાર થયો છે, પરંતુ મને વિશ્વાસ છે, આ પણ પસાર થઈ જશે.
સંજૂના ફેન્સે વિનંતી કરતા માન્યતાએ વધુમાં લખ્યું કે, મહેરબાની કરીને અફવો પર વિશ્વાસ ના કરશો. તમારા પ્રેમ અને સહકારથી અમારી મદદ કરશો. સંજૂ હંમેશા એક ફાઈટર રહ્યો છે એ જ રીતે અમારો પરિવાર પણ છે. આગળના પડકારોમાંથી બહાર આવવા માટે ભગવાને ફરીથી પરીક્ષા માટે અમને પસંદ કર્યા છે. અમે તમારા બાધાની દુઆ અને આશિર્વાદ ઈચ્છીએ છીએ અને અમે ફરીથી જીત મેળવીશું તેનો વિશ્વાસ છે.
સંજય દત્તને ગત સપ્તાહે શ્વાસ લેવામાં મુશ્કેલી પડતા તેને મુંબઈની લીલાવતી હોસ્પિટલમાં દાખલ કરવામાં આવ્યો હતો. સોમવારે તેને હોસ્પિટલમાંથી રજા આપવામાં આવી હતી ત્યારબાદ સંજય દત્તે મંગળવારે સોશિયલ મીડિયા પર પોસ્ટ શેર કરીને જણાવ્યું હતું કે મેડિકલ સારવાર માટે તે થોડો સમય કામથી બ્રેક લઈ રહ્યો છે. સંજય દત્તની આગામી ફિલ્મ સડક-2 થોડા દિવસોમાં રીલિઝ થવાની છે. આ ઉપરાંત ભૂજઃ ધ પ્રાઈડ ઓફ ઈન્ડિયા’, કેજીએફની સીક્વલમાં તેમજ ફિલ્મ શમશેરામાં પણ દત્ત જોવા મળશે.
