પ્રયાગરાજમાં 2025માં યોજાયેલા મહાકુંભ મેળા દરમિયાન ‘મહાકુંભ ગર્લ’ તરીકે જાણીતી બનેલી 18 વર્ષની વાયરલ સેન્સેશન મોનાલિસા ભોંસલેએ 11 માર્ચે તેના બોયફ્રેન્ડ ફરમાન ખાન સાથે આંતરધાર્મિક સમારોહમાં લગ્ન કર્યા હતાં. આ લગ્ન કેરળના તિરુવનંતપુરમ નજીક પૂવરમાં આવેલા અરુમાનૂર શ્રી નૈનાર દેવ મંદિરમાં થયાં હતાં.
ઘણા હિન્દુ સંગઠનોએ તેને લવ જેહાદ ગણાવી હતી. કેરળમાં એક પ્રેસ કોન્ફરન્સ દરમિયાન મોનાલિસાએ કહ્યું હતું કે “મેં હિન્દુ રીતરિવાજ મુજબ લગ્ન કર્યા છે. આ ‘લવ જેહાદ’ નથી. હું બધા ધર્મોનો આદર કરું છું અને તેમને સમાન માનું છું.
મીડિયા અહેવાલો અનુસાર, મૂળ મધ્યપ્રદેશના ઇન્દોરની રહેવાસી મોનાલિસા અને મહારાષ્ટ્રના રહેવાસી ફરમાન છ મહિના પહેલા ફેસબુક દ્વારા મળ્યા હતા. જોકે આ દંપતીને મોનાલિસાના પિતા જયસિંહ ભોંસલે તરફથી ભારે વિરોધનો સામનો કરવો પડ્યો હતો, કારણ કે તેઓ અલગ અલગ ધર્મના છે.
મોનાલિસા તાજેતરમાં પૂવરમાં તેની પહેલી મલયાલમ ફિલ્મ ‘નાગમ્મા’નું શૂટિંગ કરી રહી હતી, ત્યારે તેના પિતાએ તેને શોધી કાઢી હતી અને તેને બળજબરીથી તેમના વતન લઈ જવાનો પ્રયાસ કર્યો હતો. આ ઘટના બાદ મોનાલિસા અને ફરમાનએ કેરળની રાજધાનીના થમ્પાનૂર પોલીસ સ્ટેશનનો સંપર્ક કર્યો અને સુરક્ષાની માંગ કરી હતી. ફરિયાદ નોંધાવ્યા પછી તેના પિતાને પોલીસ સ્ટેશન બોલાવવામાં આવ્યા હતાં. પોલીસે પરિવારને કહ્યું કે મોનાલિસા 18 વર્ષની હોવાથી, તેણીને કોની સાથે રહેવાનું છે તે નક્કી કરવાનો તેને કાનૂની અધિકાર છે.
આ પછી તેને મંદિરમાં લગ્ન કર્યા હતાં. કેરળના શિક્ષણ પ્રધાન વી. શિવનકુટ્ટી સહિત ઘણા અગ્રણી કેરળના નેતાઓએ આ દંપતીને ટેકો આપવા હાજરી આપી હતી, જેમણે આ કાર્યક્રમને “કેરળની વાસ્તવિક વાર્તા” ગણાવી હતી. એમવી ગોવિંદન (સીપીઆઈ(એમ) રાજ્ય સચિવ) અને એએ રહીમ (સંસદ સભ્ય) પણ હાજર રહ્યા હતાં.
મોનાલિસા ભોંસલેને સૌપ્રથમ 2025માં પ્રયાગરાજમાં યોજાયેલા મહાકુંભ મેળા દરમિયાન રાષ્ટ્રીય ખ્યાતિ મળી હતી. તે સમયે રુદ્રાક્ષની માળા વેચતો તેનો એક વીડિયો તેના આકર્ષક અદાને કારણે વાયરલ થયો હતો. તેણીની પીળી આંખો અને તેજસ્વી સ્મિતને કારણે તેન “મોનાલિસા” ઉપનામ મળ્યુ હતું.
