ભારતીય ક્રિકેટ ટીમનો ઓસ્ટ્રેલિયાનો પ્રવાસ અનેક રીતે નોંધપાત્ર રહ્યો. ત્રણ વન-ડેની સીરીઝમાં ભારતે ક્લીન સ્વીપ નિવારી ત્રીજી અને છેલ્લી મેચમાં ઓસ્ટ્રેલિયાને સજ્જડ પરાજય આપ્યો હતો, તો ટી-20 સીરીઝમાં ટીમે 2-1થી વિજય ધ્વજ લહેરાવ્યો હતો.
આ સાથે, ટી-20માં ભારતીય ટીમ અને ટી-20 ફોર્મેટમાં ટીમના સુકાની સૂર્યકુમાર યાદવે એક વિશિષ્ટ રેકોર્ડ સર્જ્યો છે. તો યુવા ટી-20 ઓપનર અભિષેક શર્મા ભારત તરફથી આ ફોર્મેટમાં રમેલા બોલના ધોરણે સૌથી ઝડપી 1000 રન કરનારો બેટર બની રહ્યો.
તેણે 528 બોલ અને 28 ઈનિંગમાં આ સિદ્ધિ હાંસલ કરી હતી. અગાઉ, આ રેકોર્ડ સૂર્યકુમાર યાદવના નામે હતો, તેણે 573 બોલ અને 31 ઇનિંગ્સમાં આ સિદ્ધિ હાંસલ કરી હતી. જો કે, ઈનિંગ્સની દ્રષ્ટિએ વિરાટ કોહલી પ્રથમ સ્થાને છે, તેણે 27 ઈનિંગ્સમાં આ સિદ્ધિ પોતાના નામે કરી હતી.
