USA and United Kingdom Visa
પ્રતિકાત્મક તસવીર (istockphoto.com)

ચાલુ વર્ષે યુકે માટે ભારતીય વિદ્યાર્થીઓના વધેલા ધસારા અને લાંબા વેઈટિંગ પીરિયડને ધ્યાનમાં રાખી યુકેએ હવે એક્સપેન્સિવ પ્રાયોરિટી અને સુપર પ્રાયોરિટી વીઝા આપવાનું શરૂ કર્યું છે. ભારત ખાતેના બ્રિટિશ હાઈકમિશનર એલેક્સ એલિસે મંગળવારે જણાવ્યું કે, હાલમાં ભારતીય વિદ્યાર્થીઓના ધસારાને જોતા પ્રાયોરિટી અને સુપર પ્રાયોરિટી વીઝા શરૂ કરવામાં આવ્યા છે. તેમણે કહ્યું કે, ‘યુકે જુન 2022 સુધી વિવિધ દેશોના સ્ટૂડન્ટને આપેલા વીઝાનો પોતાનો જ રેકોર્ડ તોડ્યો છે. આવનારા શૈક્ષણિક વર્ષમાં હજુ વધુ વીઝા અપાશે અને ભારત એક એવો દેશ છે જ્યાંથી મોટા પ્રમાણમાં વિદ્યાર્થીઓ યુકે આવી રહ્યા છે. એટલે જો તમે આ વર્ષે યુકેમાં ભણવા જઈ રહ્યા છો, તો મહેરબાની કરી અત્યારે જ વીઝા માટે એપ્લાય કરો.’

યુકે સરકારની વેબસાઈટ મુજબ, એક્સપેન્સિવ પ્રાયોરિટી વીઝા માટે 500 પાઉન્ડ વધુ ચૂકવવાના રહેશે અને તેમાં પાંચ દિવસમાં વીઝા અપ્રુવલ અંગે નિર્ણય આપી દેવાશે. જ્યારે સુપર પ્રાયોરિટી વીઝા માટે 800 પાઉન્ડ વધારે ચૂકવવાના રહેશે અને વીઝા અપ્રુવલ અંગે મોટાભાગે એક જ દિવસમાં નિર્ણય આવી જશે. યુકે સરકારનું કહેવું છે કે, સામાન્ય રીતે સ્ટુડન્ટ વીઝા પ્રોસેસમાં 15 દિવસનો સમય લાગે છે અને ઘણા વિદ્યાર્થીઓને તેના કરતા પણ વધુ સમય રાહ જોવી પડે છે.

એલિસે જણાવ્યું કે, ‘એ વાતની ખાતરી કરી લો કે તમે બધા ડોક્યુમેન્ટ્સ બરાબર જોડ્યા છે. જેમકે, યુનિવર્સિટીનો ઓફર લેટર, સીએએસ, ટીબી સર્ટિફિકેટ અને તમારી આવકનો પુરાવો. જો તમે ઈચ્છો તો… તમે પ્રાયોરિટી વીઝા માટે અપ્લાય કરી શકો છો, જે તમને લગભગ પાંચ દિવસમાં મળી જશે અને સુપર પ્રાયોરિટી વીઝા તો તેના કરતા વધુ ઝડપી મળશે. હાલમાં અમે 15 દિવસમાં સ્ટૂડન્ટ વીઝા આપીએ છીએ. હાલમાં ઘણી માગ છે. એટલે, મહેરબાની કરી, ભારતીય વિદ્યાર્થીઓ યુકે આવવા માગે છે તે અત્યારે જ એપ્લાય કરે.’

યુકેમાં સ્પોન્સર્ડ સ્ટડી વીઝાના મામલે ભારતે ચીનને પાછળ છોડી દીધું છે. ભારત ખાતેના બ્રિટિશ હાઈકમિશનરે ગત સપ્તાહે જણાવ્યું હતું કે, ‘જૂન 2022એ પૂરા થયેલા એક વર્ષમાં ભારતીયોને મોટી સંખ્યામાં યુકે સ્ટડી, વર્ક અને વિઝિટર વિઝા આપવામાં આવ્યા છે.’ યુકેના વિઝિટર વિઝા મેળવવામાં પણ ભારતીયોની સંખ્યા (28 ટકા) વધારે છે. વિશ્વના અન્ય દેશોના સ્કીલ્ડ વર્કર વીઝા મેળવવામાં પણ ભારતીયો આગળ છે. વિશ્વના અન્ય દેશોએ આપેલા કુલ સ્કીલ્ડ વીઝાના 46 ટકા ભારતીયોને આપવામાં આવ્યા છે.