ભારત અને અમેરિકા વચ્ચે 10 વર્ષના નવી સંરક્ષણ સમજૂતીને મલેશિયામાં મંજૂરી આપવામાં આવી છે. કુઆલાલંપુરમાં ભારતના સંરક્ષણ પ્રધાન રાજનાથ સિંહ સાથે મુલાકાત પછી અમેરિકન ડીફેન્સ સેક્રેટરી પીટ હેગસેથે આ સમજૂતી અંગેની જાહેરાત કરી હતી. આ કરાર અંતર્ગત બંને દેશો એકબીજા સાથે માહિતીનું આદાન-પ્રદાન કરશે. આ કરાર મુજબ ટેકનિકલ મદદ પૂરી પાડવાનો પણ સમાવેશ થાય છે. આ સમજૂતી પછી રાજનાથ સિંહે સોશિયલ મીડિયામાં જણાવ્યું હતું કે, એક નવા યુગની શરૂઆત છે. તેમણે જણાવ્યું કે, ‘આ સંરક્ષણ સોદાનો રોડમેપ ભારત-યુએસ સંરક્ષણ સંબંધોના સમગ્ર સ્પેક્ટ્રમને નીતિ દિશા પ્રદાન કરશે. આ આપણા વધતા વ્યૂહાત્મક સમન્વયનો સંકેત છે.’
સંરક્ષણ સોદા પર પીટ હેગસેથે કહ્યું કે, આ પ્રકારની સમજૂતી અગાઉ ક્યારેય થઇ નથી. અમે 10 વર્ષ માટે આ સમજૂતી કરી છે. આ નિર્ણય બંને દેશો વચ્ચે સંકલન બનાવવાનો પ્રયાસ છે. સંરક્ષણ સોદાનો મુખ્ય હેતુ પ્રાદેશિક સ્થિરતા જાળવવા, લશ્કરી સંકલનને વધુ ગાઢ બનાવવા અને સંરક્ષણ ટેકનોલોજી સહયોગ વધારવાનો છે.
આ સમજૂતીની સીધી અસર ઇન્ડો-પેસિફિક પર પડી શકે છે.
