સિનિયર સેવા સુગર લેન્ડ દ્વારા 5 ફેબ્રુઆરીના રોજ ક્લાઈડ અને નેન્સી જેક્સ કોન્ફરન્સ સેન્ટર ખાતે લાઇવલી સીનીયર્સના સાંસ્કૃતિક મેળાવડાનું આયોજન કરવામાં આવ્યું હતું, જેમાં 30થી વધુ વરિષ્ઠ નાગરીકોએ શિક્ષણ, સંસ્કૃતિ અને ઉજવણીનો આનંદ માણ્યો હતો.
કાર્યક્રમની શરૂઆત અરવિંદભાઇ દ્વારા ભારતના પ્રજાસત્તાક દિને ભારતના સ્વતંત્રતા સંગ્રામ પરના પ્રેરણાદાયક વક્તવ્ય સાથે થઈ હતી. ત્યારબાદ સરિતા મહેતા દ્વારા લખાયેલ મકરસંક્રાંતિની ભાવનાત્મક કવિતાનું પ્રદીપ પારેખ દ્વારા પઠન કરવામાં આવ્યું હતું. મીનાક્ષી પારેખ દ્વારા આયોજિત ઉત્સવમાં ગીતો, દેશભક્તિ સંગીત અને આકર્ષક પ્રજાસત્તાક દિવસ ક્વિઝનો સમાવેશ કરવામાં આવ્યો હતો.
આ પ્રસંગે પંકજ ઠાકર, સુદેવી ઠાકર અને યોગેશ દલાલ દ્વારા મધુર બોલીવુડ ગીતો સાથે કાર્યક્રમની ઉજવણી આનંદની ટોચ પર પહોંચી હતી. તો મદનભાઇ દ્વારા લોહરી પરંપરાઓની સમજ અને ઉર્જાવાન પંજાબી ભાંગડા નૃત્ય રજૂ કરાયા હતા. આ યાદગાર કાર્યક્રમે સામાજિક બંધનોને મજબૂત બનાવવા સાથે વરિષ્ઠ વડિલોમાં વહેંચાયેલ વારસાની ઉજવણી કરી હતી.
