બોલીવૂડના જાણીતા ગાયક સોનુ નિગમે તાજેતરમાં એક ઇન્ટરવ્યૂમાં સંગીતમાં ટેક્નોલોજી અને તેના મહત્વ વિશે વાત કરી હતી. તેણે કહ્યું કે, ‘આર્ટિફિશિયલ ઇન્ટેલિજન્સ (એઆઈ) સાથે આસિસ્ટન્ટ જેવું કામ લો, એને બોસની જેમ માન ન આપો. તમારી સર્જનાત્મકતાને મદદ કરવા માટે તેનો એક સાધન તરીકે ઉપયોગ કરો. પરંતુ તે ક્યારેય વ્યક્તિના આત્માને, જે સંગીતને તેની ખરી સુગંધ આપે છે, તેનું સ્થાન ક્યારેય લઈ શકશે નહીં.’
તેમણે અલગોરીધમ સાથે જોડાયેલા કન્ટેન્ટ અંગે કહ્યું કે, ‘હાલ, મને એવું લાગે છે કે, તમને મળી રહેલું સંગીત અલગોરીધમ આધારિત હોય, પરંતુ મને ખરેખર એ સાંભળવું ગમે છે, તેથી હાલ તો મને એમાં કોઈ તકલીફ લાગતી નથી. આપણે બસ રાહ જોવી પડશે અને જોવું પડશે કે એ કઇ રીતે આગળ વધે છે. અગાઉ લોકો સંગીત ખરીદવા માટે બહાર જતાં હતાં, જે એક ઊંડો વ્યક્તિગત અનુભવ હતો. હવે સમય બદલાતા કેસેટ અને આલ્બમનું સ્થાન સ્પોટીફાય અને અન્ય ઓડિયો પ્લેટફર્મે લીધું છે, તેના કારણે હકીકતમાં પોતાની ઇચ્છા મુજબનું સંગીત સાંભળવાનો અનુભવ બિલકુલ યાદ આવે છે.’ પોતાના ભવિષ્યના આયોજન અંગે સોનુ નિગમે જણાવ્યું હતું કે, આવનારા સમયમાં તે વિવિધ શહેરોમાં પોતાની સતરંગી કન્સર્ટની ટૂર કરશે.’
