સાઉથ અમેરિકાના આર્જેન્ટિનામાં 7.5 ની તીવ્રતાનો મોટો ભૂકંપ આવ્યો છે. આ કારણે સુનામીની ચેતવણી આપવામાં આવી છે. આ ભૂકંપ દક્ષિણ આર્જેન્ટિનાના ઉશુઆઇયાથી 222 કિલોમીટર દક્ષિણમાં ડ્રેક પેસેજ (પાણીની અંદર) સ્થાનિક સમય મુજબ બપોરે એક કલાકના અરસામાં આવ્યો હતો.
સમુદ્રમાં આ ભૂકંપના કેન્દ્રબિંદુની ઊંડાઈ 10 કિ.મી. હતી. અમેરિકન ભૂસ્તરશાસ્ત્રીય સર્વે મુજબ, એક જ સ્થળે 15 મિનિટની અંદર 5.4, 5.7 અને 5.6 ની તીવ્રતાના ત્રણ આફ્ટરશોક આવ્યા હતા. ડ્રેક પેસેજ એ દક્ષિણ અમેરિકાના કેપ હોર્ન, ચિલી, આર્જેન્ટિના અને એન્ટાર્કટિકાના દક્ષિણ શેટલેન્ડ ટાપુઓ વચ્ચેનો સમુદ્રી વિસ્તાર છે. એડમિનિસ્ટ્રેશને લોકોને ઊંચાણવાળા સ્થળોએ જવા જણાવ્યું છે. અસરગ્રસ્ત વિસ્તારોમાં સુનામીની ચેતવણીના ભાગરૂપે સાયરન વાગી હતી. જોકે, હજુ સુધી કોઈ જાનહાનિના સમાચાર નથી. એક દિવસ પહેલાં આર્જેન્ટિનામાં પણ 5.8ની તીવ્રતાનો ભૂકંપ આવ્યો હતો.
આર્જેન્ટિનાના પાડોશી દેશ ચિલીના દરિયાકાંઠાના વિસ્તારોને પણ એલર્ટ પર કરવામાં આવ્યું છે. આ ચેતવણીમાં કહેવામાં આવ્યું છે કે દરિયાઈ મોજાં ચિલીના પ્યુઅર્ટો વિલિયમ્સ સુધી પહોંચી શકે છે. ચિલીની રાષ્ટ્રીય આપત્તિ સેવાએ દક્ષિણ કિનારાના લોકોને જગ્યા ખાલી કરવાનો અનુરોધ કર્યો હતો. ચિલીના પ્રેસિડેન્ટ ગેબ્રિયલ બોરિકે કહ્યું કે, દેશ પાસે ભૂકંપનો સામનો કરવા માટે તમામ સંસાધનો છે. તેમણે સોશિયલ મીડિયા પોસ્ટમાં કહ્યું કે અમે લોકોને મેગેલન વિસ્તારમાં બીચથી દૂર જવા અપીલ કરીએ છીએ.
