જાણીતા સિંગર- રેપર બાદશાહના 19 સપ્ટેમ્બર, 2025એ અમેરિકા ડલાસમાં આવેલા કર્ટિસ કલવેલ સેન્ટર ખાતે યોજાનારા કોન્સર્ટ અંગે ભારતમાં વિવાદ ઊભો થયો હતો. ફેડરેશન ઓફ વેસ્ટર્ન ઈન્ડિયા સિને એમ્પ્લોયીઝ (FWICE)એ બાદશાહને પત્ર લખીને ડલ્લાસમાં તેમના શો અંગે સ્પષ્ટતા માંગી છે, જે પાકિસ્તાની કંપની દ્વારા પ્રાયોજિત હોવાનું કહેવાય છે.
બાદશાહને સંબોધીને આ પત્રમાં જણાવાયું છે કે તમે 19 સપ્ટેમ્બર, 2025એ અમેરિકાના ડલાસમાં આવેલા કર્ટિસ કલવેલ સેન્ટર ખાતે ‘બાદશાહ અન-ફિનિશ્ડ ટૂર’માં કાર્યક્રમ આપવાના છો. આ કાર્યક્રમ પાકિસ્તાની નાગરિકની માલિકીની કંપની ‘3સિક્સટી શોઝ’એ સ્પોન્સર કર્યો હોવાનું કહેવાય છે. ભારત સરકારના માહિતી અને પ્રસારણ મંત્રાલય દ્વારા આપવામાં આવેલા આદેશો અનુસાર ભારતીય મનોરંજન ઉદ્યોગના તમામ કલાકારો અને ટેકનિશિયનોને સ્પષ્ટ સૂચના આપી છે કે તેઓ પાકિસ્તાની નાગરિકો કે પાકિસ્તાન સાથે જોડાયેલા સંગઠનો સાથે કોઈપણ પ્રકારના પ્રોફેશનલ કામ કે સહયોગમાં ભાગ લેવાનું ટાળે.આ આદેશો સરહદ પારથી ભારત વિરુદ્ધ થઈ રહેલી આતંકવાદી પ્રવૃત્તિઓને કારણે લાગુ કરવામાં આવ્યા હતા. અમને વિશ્વાસ છે કે એક સન્માનિત ભારતીય કલાકાર તરીકે તમે દેશની ભાવનાઓ અને FWICE તેમજ ભારત સરકાર દ્વારા જાહેર કરાયેલા આદેશોનું પાલન કરશો.
