વ્હાઇટ હાઉસ નજીક એક અફઘાન નાગરિક દ્વારા નેશનલ ગાર્ડ સર્વિસના બે સભ્યોને ગોળી મારવાની ઘટના પછી ટ્રમ્પ એડમિનિસ્ટ્રેશને જણાવ્યું હતું કે, તેઓ ‘દરેક જોખમી દેશ’ના ઇમિગ્રન્ટ્સને આપવામાં આવેલા તમામ ગ્રીનકાર્ડ્સની ફરીથી ‘કડક’ તપાસ કરશે. યુએસ સિટીઝનશિપ એન્ડ ઇમિગ્રેશન સર્વિસીઝ (USCIS)ના ડાયરેક્ટર જોસેફ એડલોએ જણાવ્યું હતું કે, તેમણે પ્રેસિડેન્ટ ટ્રમ્પની વિનંતીના આધારે ‘આવી ચિંતા ઊભી કરનારા જોખમી દરેક દેશના તમામ વિદેશીઓની ગ્રીનકાર્ડની સંપૂર્ણ અને ફરીથી કડક તપાસ’ કરવાની સૂચના આપી છે. તેમણે વધુમાં કહ્યું હતું કે, ‘અમેરિકા અને દેશના લોકોની સુરક્ષા સૌથી મહત્વની છે. તેમણે આ સ્થિતિ માટે અગાઉના જો બાઇડેનના વહીવટતંત્રને ‘અવિચારી નીતિઓ’ માટે દોષિત ઠેરવ્યું હતું. અત્રે ઉલ્લેખનીય છે કે, અફઘાન નાગરિક રહેમાનુલ્લાહ લકનવાલે ગત બુધવારે વ્હાઇટ હાઉસ નજીક બે નેશનલ ગાર્ડ્સ પર ગોળીબાર કર્યો હતો. આ ઘટનામાં યુએસ આર્મી સ્પેશિયાલિસ્ટ 20 વર્ષીય સારા બેકસ્ટ્રોમનું મોત થયું હતું, જ્યારે યુએસ એર ફોર્સ સ્ટાફ સાર્જન્ટ 24 વર્ષીય એન્ડ્રુ વોલ્ફની હાલત હજુ પણ ગંભીર છે. જે દેશના લોકો સામે આવી કાર્યવાહી કરવામાં આવી રહી છે તેમાં ગ્રીનકાર્ડ ધારક ભારતીયોનો સમાવેશ થતો નથી.
આ કાર્યવાહી કરવા માટે તંત્ર દ્વારા ઉચ્ચ જોખમ ધરાવતા 19 દેશોની યાદી બનાવવામાં આવી છે. આ દેશમાં અફઘાનિસ્તાન, મ્યાનમાર, બરુંડી, ચાડ, કોંગો, ક્યુબા, એક્વાટોરીયલ ગીનીયા, એટ્રીયા, હૈતી, ઇરાન, લાઓસ, લિબિયા, સીએરા લીઓન, સોમાલિયા, સુદાન, ટોગો, તુર્કમેનિસ્તાન, વેનેઝુએલા અને યેમેનનો સમાવેશ થાય છે.
