વડાપ્રધાન નરેન્દ્ર મોદી 11 જાન્યુઆરીએ રાજકોટ શહેરમાં કચ્છ અને સૌરાષ્ટ્ર ક્ષેત્ર માટેની વાઇબ્રન્ટ ગુજરાત રિજનલ કોન્ફરન્સ (VGRC)નું ઉદ્ઘાટન કરશે. કચ્છ અને સૌરાષ્ટ્ર ક્ષેત્ર પર ધ્યાન કેન્દ્રિત કરતી આ બે દિવસીય કોન્ફરન્સ ૧૧ અને ૧૨ જાન્યુઆરીએ રાજકોટમાં મારવાડી યુનિવર્સિટી પરિસરમાં યોજાશે.
રાજ્યના કૃષિ પ્રધાન અને સરકારના પ્રવક્તા જીતુ વાઘાણીએ જણાવ્યું હતું કે આ કોન્ફરન્સનો ઉદ્દેશ્ય આ ક્ષેત્રમાં ઉભરતી આર્થિક, ઔદ્યોગિક અને સાંસ્કૃતિક તકોનું પ્રદર્શન અને પ્રકાશ પાડવાનો છે. વડાપ્રધાન મોદી ૧૧ જાન્યુઆરીએ કચ્છ અને સૌરાષ્ટ્ર ક્ષેત્ર માટે બીજા વાઇબ્રન્ટ ગુજરાત પ્રાદેશિક પરિષદ (VGRC)નું ઉદ્ઘાટન કરવા રાજકોટમાં આવશે. આ ભવ્ય કાર્યક્રમ માટે ૬,૦૦૦થી વધુ લોકોએ નોંધણી કરાવી છે અને ૨૧ દેશોના પ્રતિનિધિઓ અને ઉદ્યોગપતિઓ ભાગ લે તેવી અપેક્ષા છે.
ઉત્તર ગુજરાત ક્ષેત્ર માટે પ્રથમ વાઇબ્રન્ટ ગુજરાત પ્રાદેશિક પરિષદ ઓક્ટોબર 2025માં યોજાઈ હતી.રાજ્ય સરકારે 2027માં યોજાનારી વાયબ્રન્ટ ગુજરાત સમિટની 11મી આવૃત્તિ પહેલા રાજ્યના ચાર અલગ અલગ પ્રદેશોમાં ચાર VGRCનું આયોજન કરવાની યોજના બનાવી છે.
આ પ્રાદેશિક સમિટ દરમિયાન, કચ્છ અને સૌરાષ્ટ્ર ક્ષેત્રની શક્તિઓને ઉજાગર કરવા, નવા રોકાણો આકર્ષવા અને સ્થાનિક ઉત્પાદનો માટે વૈશ્વિક બજારો શોધવા પર ધ્યાન કેન્દ્રિત કરવામાં આવશે. સમગ્ર પરિષદ અને પ્રદર્શન 26,400 ચોરસ મીટરના વિસ્તારમાં યોજાશે. બે દિવસીય કોન્ફરન્સ દરમિયાન B2B અને B2G મીટિંગ્સ, એક પ્રદર્શન, ક્ષેત્ર-વિશિષ્ટ સેમિનાર અને રિવર્સ ખરીદનાર-વેચાણકર્તા મીટિંગ્સ યોજાશે.
