ભાજપના સાંસદ નિશિકાંત દુબેએ કોંગ્રેસ નેતા રાહુલ ગાંધી વિરુદ્ધ લોકસભામાં ‘સબસ્ટેન્ટિવ પ્રસ્તાવ’ લાવવા માટે નોટિસ આપી હતી અને રાહુલ ગાંધીનું લોકસભા સભ્યપદ રદ કરવાની અને તેમને પર ચૂંટણી લડવા સામે આજીવન પ્રતિબંધની માગણી કરી હતી.
સંસદ ભવનના સંકુલમાં દુબેએ કહ્યું હતું કે તેમણે પોતાની નોટિસમાં જણાવ્યું છે કે કેવી રીતે વિપક્ષના નેતા સોરોસ ફાઉન્ડેશન, યુએસએઆઈડી, ફોર્ડ ફાઉન્ડેશન સાથે હાથ મિલાવીને વિદેશની મુલાકાત લે છે અને ભારત વિરોધી તત્વો સાથે “સાથે મળીને” કામ કરે છે. વિશેષાધિકાર પ્રસ્તાવની નોટિસ અપાઈ નથી. મેં એક સબસ્ટેન્ટિવ મોશન નોટિસ આપી છે, જેમાં મેં ઉલ્લેખ કર્યો છે કે તેઓ સોરોસ ફાઉન્ડેશન, ફોર્ડ ફાઉન્ડેશન અને યુએસએઆઈડી સાથે થાઈલેન્ડ, વિયેતનામ, કંબોડિયાની મુલાકાત લે છે અને ભારત વિરોધી શક્તિઓ સાથે સાંઠગાંઠ કરે છે
અગાઉ 11 ફેબ્રુઆરીએ ભારત અને અમેરિકા વચ્ચેના વચગાળાના વેપાર કરારના મુદ્દે કેન્દ્ર સરકાર પર આકરા પ્રહાર કરતાં વિરોધ પક્ષના નેતા રાહુલ ગાંધીએ જણાવ્યું હતું કે સરકારે વેપાર કરાર દ્વારા ભારત માતાને વેચી દીધી છે. શું આની શરમ નથી આવતી? દેશની ઉર્જા સુરક્ષા અમેરિકાને સોંપીને સરકારે સંપૂર્ણ શરણાગતિ સ્વીકારી છે. સરકારે ખેડૂતોના હિતો સાથે પણ સમાધાન કર્યું છે. કેન્દ્રીય બજેટ પરની ચર્ચામાં ભાગ લેતા રાહુલ ગાંધીએ જણાવ્યું હતું કે તેમણે (મોદીએ) ભારતને કેમ વેચી દીધું છે, કારણ કે અમેરિકાએ તેમનું ગળું દબાવ્યું હતું.
તેમણે જણાવ્યું હતુ કે આ ફક્ત વડાપ્રધાનની શરણાગતિ નથી, તેમણે 1.5 અબજ ભારતીયોના ભવિષ્યની શરણાગતિ સ્વીકારી છે. તેમણે શરણાગતિ સ્વીકારી છે, કારણ કે તેઓ ભાજપના નાણાકીય માળખાને સુરક્ષિત રાખવા માંગતા હતાં, જેના પર અમેરિકામાં કેસ ચાલી રહ્યો છે. આપણે અસ્થિરતાના સમયમાં આગળ વધી રહ્યા છીએ અને રાષ્ટ્ર વેચાઈ ગયું છે. તેનો ડેટા વેચાઈ ગયો છે, તેના ખેડૂતો વેચાઈ ગયા છે, આપણા બધા સોફ્ટવેર એન્જિનિયરો વેચાઈ ગયા છે. નાના અને મધ્યમ ઉદ્યોગો વેચાઈ ગયા છે, આપણા દળો અને આપણી ઉર્જા સુરક્ષા વેચાઈ ગઈ છે
રાહુલ ગાંધી પર વળતો પ્રહાર કરતાં સંસદીય બાબતોના મંત્રી કિરેન રિજિજુએ જણાવ્યું હતું કે વિપક્ષના નેતાનું ભાષણ જૂઠ્ઠાણાથી ભરેલું હતું અને શાસક ગઠબંધન આ જૂઠાણાને ગૃહના રેકોર્ડમાંથી દૂર કરવાની માગણી કરશે. વિપક્ષના નેતાએ જે કંઈ કહ્યું છે તેને પ્રમાણિત કરવા માટે અધ્યક્ષને નોટિસ મોકલશું. કોંગ્રેસના નેતા વારંવાર જાણી જોઈને ખોટું બોલે છે અને પછી ગૃહમાંથી ભાગી જાય છે.
