બહુ વિવાદાસ્પદ બનેલા અને ક્રિકેટ ચાહકોમાં જેનો આતુરતાથી ઈંતજાર હતો તે ટી-20 વર્લ્ડ કપના ભારત – પાકિસ્તાન જંગ રવિવારે કોલંબોના આર. પ્રેમદાસા સ્ટેડિયમમાં એકતરફી મુકાબલો બની રહ્યો હતો, જેમાં ભારતે 7 વિકેટે 175 રનનો રેકોર્ડ સ્કોર ખડકી દીધો હતો. એ પછી, અપેક્ષાથી અલગ, હાર્દિક પંડ્યા અને જસપ્રીત બુમરાહે પાકિસ્તાનની ઈનિંગના પ્રારંભે જ તેના ટોચના ત્રણ બેટરને સાવ સસ્તામાં ઘરભેગા કરી દેતા પાકિસ્તાની છાવણીમાં સન્નાટો છવાઈ ગયો હતો.
બે ઓવરના અંતે પાકિસ્તાનનો સ્કોર 3 વિકેટે 13 રનનો હતો. એ પછી પાંચમી અને પોતાની પહેલી ઓવરમાં અક્ષર પટેલે બાબર આઝમને વિદાય કરી દેતાં ટીમનો સ્કોર 4 વિકેટે 34 રનનો થયો હતો. ઉસ્માન ખાન અને શાદાબ ખાને પાંચમી વિકેટની ભાગીદારીમાં 39 રન ઉમેર્યા ત્યારે લાગતું હતું કે પાકિસ્તાન પણ થોડો પ્રતિકાર તો કરશે, પણ 44 રન કરી ઉસ્માન વિદાય થયા પછી જાણે પાકિસ્તાને શરણાગતિ સ્વીકારી લીધી હોય તેમ ધડાધડ વિકેટો પડતી ગઈ હતી અને 18મી ઓવરના અંતે તો ટીમ ફક્ત 114 રન કરી ઓલાઉટ થઈ ગઈ હતી.
એ પહેલા, ભારતની ઈનિંગમાં અભિષેક શર્મા ચાહકોને ખુશ કરી શક્યો નહોતો અને પહેલી જ ઓવરમાં ખાતુ ખોલાવ્યા વિના વિદાય થઈ ગયો હતો. પણ તેના સાથી ઈશાન કિશન ઉપર જાણે અભિષેકની વિકેટની કોઈ અસર થઈ ના હોય તેમ ફક્ત 40 બોલમાં 3 છગ્ગા અને 10 ચોગ્ગા સાથે 77 રનની આતશબાજી બતાવી હતી. ભારતે પાવર પ્લેના અંતે છ ઓવર પછી એક વિકેટે 52 કર્યા હતા. ઈશાને 27 બોલમાં 50 રન કર્યા હતા. ધીમી વિકેટ ઉપર ભારતના સુકાની સૂર્યકુમાર યાદવ સહિતના તમામ બેટરને ઝડપી સ્કોર કરવામાં મુશ્કેલી નડી હતી, પણ કિશનની વાત જ કઈંક અલગ હતી.
તેના સિવાય સૂર્યકુમારે 29 બોલમાં 32, તિલક વર્માએ 24 બોલમાં 25 અને શિવમ દુબેએ 17 બોલમાં 27 કરી ટીમને 175ના સ્કોરે પહોંચાડી હતી. અભિષેકની જેમ બેટિંગમાં હાર્દિક પંડ્યા અને અક્ષર પટેલ પણ ખાતુ ખોલાવ્યા વિના વિદાય થયા હતા. પાકિસ્તાને સાત બોલર અજમાવ્યા હતા, જેમાંથી છ તો સ્પિનર્સ હતા. બહુ ચર્ચાસ્પદ બનેલો ઉસ્માન તારિક પણ ખાસ અસરકારક નહોતો રહ્યો, તેણે ચાર ઓવરમાં 24 રન આપી એક વિકેટ લીધી હતી. સાઈમ અયુબ ચાર ઓવરમાં 25 રન આપી ત્રણ વિકેટ સાથે સૌથી વધુ સફળ રહ્યો હતો, તો શહીન શાહ આફ્રિદીની ઈશાન કિશને કરેલી ધોલાઈ પછી તેને એક વિકેટ તો મળી હતી, પણ ફક્ત બે ઓવરમાં તેણે 31 રન આપ્યા હતા. ઈશાન કિશન દેખિતી રીતે જ પ્લેયર ઓફ ધી મેચ રહ્યો હતો.
ભારત હવે ત્રણ વિજય સાથે સુપર 8માં ક્વોલિફાઈ થઈ ગયું છે, જ્યારે પાકિસ્તાન માટે તેનો માર્ગ મુશ્કેલ છે, અમેરિકાની ટીમ પણ ભારે સ્પર્ધા સાથે મુશ્કેલી ઉભી કરી રહી જણાય છે.
