ગુજરાત આતંકવાદ વિરોધી ટુકડી (ATS) અને કોસ્ટ ગાર્ડે પોરબંદરના દરિયાકાંઠાથી આશરે 200 કિલોથી વધુ શંકાસ્પદ રાસાયણિક પદાર્થો સાથે એક સ્પીડબોટમાંથી બે ઇરાની નાગરિકોની ધરપકડ કરી હતી.
એટીએસના ડેપ્યુટી ઇન્સ્પેક્ટર જનરલ (ડીઆઈજી) સુનિલ જોશીએ જણાવ્યું હતું કે સંયુક્ત કાર્યવાહીમાં બંને એજન્સીઓએ સોમવારે રાત્રે પોરબંદર કિનારાથી લગભગ 140 નોટિકલ માઇલ દૂર એક ઈરાની સ્પીડબોટને અટકાવી હતી, જેમાંથી સફેદ પાવડરના 203 પેકેટ જપ્ત કરાયા હતાં અને આરોપીની ધરપકડ કરાઈ હતી..બોટમાંથી સફેદ પાવડર કેમિકલ ધરાવતા પેકેટ મળી આવ્યાં હતાં અને આ પદાર્થને ફોરેન્સિક લેબોરેટરીમાં પરીક્ષણ માટે મોકલવામાં આવ્યો હતો. પ્રાથમિક હેરોઈન ડિટેક્શન કીટમાં આ કેમિકલ ઓળખી શકાયું નથી.
જોશીએ જણાવ્યું હતું કે પ્રથમ દ્રષ્ટિએ એવું લાગે છે કે બંનેએ ઇરાનથી સ્પીડબોટ પર મુસાફરી કરી હતી. જે રીતે તેઓએ સ્પીડબોટમાં આટલી દૂર સુધી મુસાફરી કરી તે ખૂબ જ હિંમતભર્યું છે. ઈરાન જેવા દૂરના સ્થળેથી સ્પીડબોટ પર મુસાફરી કરવી દુર્લભ છે. છેલ્લા ચાર વર્ષમાં આવા ફક્ત બે જ કેસ નોંધાયા છે. અમારી માહિતી મુજબ આ પેકેટો પંજાબના એક વ્યક્તિને આપવાના હતાં. આ સંદર્ભમાં તપાસ ચાલી રહી છે.
અધિકારીએ જણાવ્યું હતું કે ATSને એક બાતમી મળી હતી કે ઈરાની ડ્રગ તસ્કર હાજી ફિદાએ ઈરાનના કોનારાક બંદરથી શંકાસ્પદ રાસાયણિક પદાર્થનો માલ મોકલ્યો છે. આરોપીઓ, અબ્દુલ માજિદ અને અબ્દુલ સત્તાર, ઈરાનના ચાબહારના રહેવાસી છે
