બોલિવૂડ અભિનેતા સલમાન ખાનના પિતા અને પીઢ પટકથા લેખક સલીમ ખાનને મુંબઈની લીલાવતી હોસ્પિટલમાં દાખલ કરાયા હતાં. 90 વર્ષીય લેખક હાલમાં હોસ્પિટલના ઇન્ટેન્સિવ કેર યુનિટ (ICU)માં છે.
સલમાન ખાન ઉપરાંત સલીમ ખાનની પુત્રી અલવીરા ખાન, જમાઈ અતુલ અગ્નિહોત્રી અને પૌત્ર અયાન અગ્નિહોત્રીએ પણ હોસ્પિટલમાં તેમને મળવા ગયા હતાં. સલીમ ખાનની દત્તક પુત્રી અર્પિતા ખાનના પતિ, અભિનેતા આયુષ શર્મા પણ હોસ્પિટલમાં જોવા મળ્યા હતા.
તેમના ભૂતપૂર્વ સાથીદાર જાવેદ અખ્તર સાથે શોલે, હાથી મેરે સાથી, ઝંજીર અને મિસ્ટર ઈન્ડિયા જેવી પ્રતિષ્ઠિત ફિલ્મો લખવા માટે જાણીતા સલીમ ખાને 24 નવેમ્બર, 2025ના રોજ તેમનો 90મો જન્મદિવસ ઉજવ્યો હતો.
સલીમ ખાને લેખક જાવેદ અખ્તર સાથે મળીને પ્રખ્યાત “સલીમ-જાવેદ” જોડી બનાવી હતી. આ જોડીએ 1970ના દાયકામાં મુખ્ય પ્રવાહના હિન્દી સિનેમાને ફરીથી વ્યાખ્યાયિત કર્યું હતું. તેમની કહાનીમાં મજબૂત પાત્રો, શક્તિશાળી સંવાદો અને સ્પષ્ટ સામાજિક વાસ્તવિકતાનો સમાવેશ થતો હતો. તેમની સૌથી પ્રખ્યાત ફિલ્મોમાં શોલેનો સમાવેશ થાય છે, જે હજુ પણ ભારતીય સિનેમાની શ્રેષ્ઠ ફિલ્મોમાંની એક માનવામાં આવે છે. “દીવાર,” “ઝંજીર,” અને “ડોન” જેવી ફિલ્મોએ પણ અપાર સફળતા મેળવી હતી.
