નોર્થ ઇસ્ટ લંડનમાં મોટા પ્રમાણમાં મીઝલ્સ (ઓરી)નો ચેપ ફાટી નીકળ્યા બાદ નાના બાળકોને મોટા પ્રમાણમાં હોસ્પિટલમાં દાખલ કરાયા હતા. આરોગ્ય અધિકારીઓએ ઓરીનો વાઇરસ રાજધાની લંડનમાં ઝડપથી ફેલાઈ શકે તેવી આશંકા જાહેર કરી તાત્કાલિક ચેતવણી જારી કરી છે.
ઓરી એ સૌથી વધુ ચેપી રોગોમાંનો એક છે અને તે ન્યુમોનિયા અને મગજની બળતરા સહિત ગંભીર તકલીફોનું કારણ બની શકે છે.
યુકે હેલ્થ સિક્યુરિટી એજન્સી (UKHSA) એ 1 જાન્યુઆરીથી 9 ફેબ્રુઆરી દરમિયાન એનફિલ્ડમાં લેબોરેટરીમાં ચકાસવામાં આવેલા ઓછામાં ઓછા 34 ઓરીના કેસોની પુષ્ટિ કરી છે, જેમાં સાત શાળાઓ અને એક નર્સરીમાં 60થી વધુ શંકાસ્પદ કેસ નોંધાયા છે. મોટાભાગના કેસોમાં 10 વર્ષથી ઓછી ઉંમરના રસી ન અપાઇ હોય તેવા બાળકોનો સમાવેશ થાય છે.
UKHSA ના કન્સલ્ટન્ટ એપિડેમિયોલોજિસ્ટ ડૉ. વેનેસા સલિબાએ જણાવ્યું હતું કે આ રોગચાળો “મોટેભાગે શાળાઓ અને નર્સરીઓમાં રસી ન અપાઇ હોય તેવા બાળકોને અસર કરી રહ્યો છે, જેમાં કેટલાકને હોસ્પિટલમાં સારવારની જરૂર પડી છે.”
એનફિલ્ડમાં મીઝલ્સનો વેક્સીનેશન દર ઇંગ્લેન્ડમાં સૌથી નીચો રહ્યો છે, ગયા વર્ષે પાંચ વર્ષની ઉંમરના ફક્ત 64.3% બાળકોને MMR રસીના બંને ડોઝ મળ્યા હતા. વિશ્વ આરોગ્ય સંસ્થા (WHO) સહિત વૈશ્વિક આરોગ્ય અધિકારીઓએ તાજેતરમાં પુષ્ટિ આપી છે કે યુકેએ ઓરી નાબૂદીનો દરજ્જો ગુમાવી દીધો છે.
ઇમ્પિરિયલ કોલેજ લંડનના પ્રોફેસર અઝીમ મજીદે જણાવ્યું હતું કે ” આ રોગચાળો ખૂબ જ ચિંતાજનક છે અને વેક્સીનનો ઓછો વપરાશ સમગ્ર લંડનમાં વધુ ફેલાવાને વેગ આપી શકે છે.’’
એનફિલ્ડ કાઉન્સિલ આ રોગચાળાને રોકવા માટે NHS અને UKHSA સાથે કામ કરી રહી છે, જ્યારે માતાપિતાને બાળકોને સંપૂર્ણ રસી આપવામાં આવે તેની ખાતરી કરવા વિનંતી કરવામાં આવી રહી છે, કેચ-અપ ક્લિનિક્સ હવે લંડનના ઘણા બરોમાં કાર્યરત છે.
