અમેરિકન પ્રેસિડેન્ટ ડોનાલ્ડ ટ્રમ્પનાં પત્ની મેલેનિયા સોમવારે યોજાનારી UNSC મીટિંગની અધ્યક્ષતા કરશે. આ અંગે તેમની ઓફિસે એક નિવેદનમાં જણાવ્યું હતું કે, ‘ફર્સ્ટ લેડી મેલેનિયા ટ્રમ્પ યુનાઇડેટ નેશન્સમાં ઇતિહાસ રચવા માટે તૈયાર છે, તેઓ સીક્યુરિટી કાઉન્સિલનું અધ્યક્ષપદ સંભાળીને સહિષ્ણુતા અને વિશ્વ શાંતિના મુદ્દે શિક્ષણની ભૂમિકાને મહત્ત્વ આપશે.’ સોમવારે બપોરે 3:00 કલાકે (2000 GMT) આ મીટિંગ યોજાશે, જેમાં શિક્ષણ, ટેકનોલોજી, શાંતિ અને સુરક્ષા પર મુખ્ય ચર્ચા થશે. અત્રે ઉલ્લેખનીય છે કે, પ્રથમવાર કોઈ અમેરિકન ફર્સ્ટ લેડી સીક્યુરિટી કાઉન્સિલનું નેતૃત્વ કરશે. આ અંગે યુએન સેક્રેટરી-જનરલના પ્રવક્તા સ્ટીફન ડુજારિકે ગુરુવારે જણાવ્યું હતું કે, ફર્સ્ટ લેડીની આ મુલાકાત ‘સીક્યુરિટી કાઉન્સિલ અને શિક્ષણ મુદ્દે અમેરિકા જે મહત્વ અનુભવે છે તેનો સંકેત’ દર્શાવે છે.
