અમેરિકાના ફ્લોરિડાના ‘પામ બીચ ઇન્ટરનેશનલ એરપોર્ટ’નું નામ બદલીને પ્રેસિડેન્ટ ડોનાલ્ડ ટ્રમ્પના નામ સાથે જોડવાનો નિર્ણય લેવાયો છે. આ અંગે ગવર્નર રોન ડીસેન્ટિસે એક બિલને મંજૂરી આપી છે, જે અંતર્ગત હવે આ એરપોર્ટ ‘પ્રેસિડેન્ટ ડોનાલ્ડ જે. ટ્રમ્પ ઇન્ટરનેશન એરપોર્ટ’ તરીકે ઓળખાશે. ટ્રમ્પ તેમના કાર્યકાળ દરમિયાન જ એરપોર્ટને નામ આપનારા પ્રથમ પ્રેસિડેન્ટ બનશે. આ ઉપરાંત, અમેરિકાના ઇતિહાસમાં પ્રથમવાર ચલણી નોટો પર કોઈ કાર્યરત પ્રેસિડેન્ટના હસ્તાક્ષર છપાશે. આઝાદીના 250મા વર્ષની ઉજવણીના ભાગરૂપે ટ્રેઝરી વિભાગે 165 વર્ષ જૂની પરંપરા તોડતા આ નિર્ણય લીધો છે. હવે નોટો પર ટ્રેઝરરના બદલે ટ્રમ્પ અને ટ્રેઝરી સેક્રેટરી સ્કોટ બેસેન્ટના હસ્તાક્ષર હશે. જૂન મહિનાથી ટ્રમ્પના હસ્તાક્ષર દર્શાવેલી પ્રથમ 100 ડોલરની નોટો છાપવાની શરૂઆત થશે.
