યુકે હેલ્થ સીક્યુરિટી એજન્સી (UKHSA)એ આવનારા ઇસ્ટર બ્રેક અને વસંત ઋતુમાં પ્રવાસ કરતી વખતે લોકોને મચ્છરજન્ય ઇન્ફેક્શનથી સાવચેત રહેવા જણાવ્યું છે. જોકે, નવા ડેટામાં સારી બાબત એ જોવા મળી છે કે, 2025માં ડેન્ગ્યુના કેસમાં મહત્ત્વપૂર્ણ રીતે ઘટાડો નોંધાયો છે. ઇંગ્લેન્ડમાં મુસાફરી સંબંધિત ચિકનગુનિયાના કેસ એક દસકા કરતાં વધુ સમયમાં સૌથી વધુ સ્તરે જોવા મળ્યા છે અને દેશમાં પરત આવી રહેલા પ્રવાસીઓમાં મેલેરિયાના કેસોની સંખ્યા પણ ઉચ્ચ સ્તરે જોવા મળી રહી છે. UKHSAના તાજેતરમાં જાહેર થયેલા મુસાફરી સંબંધિત ઇન્ફેક્શન રીપોર્ટમાં જણાવ્યા મુજબ, 2025માં કુલ 160 ચિકનગુનિયાના કેસ નોંધાયા હતા, જે 2014 પછીનો સૌથી વધુ હતા. 2024ની તુલનામાં તેમાં 43 ટકાનો વધારા સાથે 112 કેસ નોંધાયા હતા. 2025માં મોટાભાગના ઇન્ફેક્શનના કેસ એપ્રિલ અને સપ્ટેમ્બર વચ્ચે નોંધાયા હતા. આ ડેટા ઇસ્ટર અને વિદેશમાં વસંત ઋતુમાં મુસાફરી દરમિયાન કરડતાં મચ્છરોથી સાવચેત રહેવાના મહત્વને ઉજાગર કરે છે.
ચિકનગુનિયાના 160માંથી 159 કેસ ઈંગ્લેન્ડમાં અને એક વેલ્સમાં નોંધાયા હતા. લંડનમાં (56 ટકા) સૌથી વધુ કેસ નોંધાયા હતા, જે ગત વર્ષોના પ્રમાણ જેટલા જ હતા. આ તમામ ઇન્ફેક્શન મુસાફરી સંબંધિત હતા, જેમાં મોટાભાગના શ્રીલંકા (75 કેસ), ભારત (17 કેસ) અને બાંગ્લાદેશ (16 કેસ) સાથે સંકળાયેલા હતા. આ તારણ વૈશ્વિક પરિસ્થિતિને આધિન છે, કારણ કે વર્લ્ડ હેલ્થ ઓર્ગેનાઇઝેશન (WHO) એ 2025માં વૈશ્વિક સ્તરે નોંધપાત્ર પ્રમાણમાં ચિકનગુનિયાનો પ્રકોપ હોવાનું જણાવ્યું હતું, જેમાં હિન્દ મહાસાગર ક્ષેત્રના દેશોમાં મોટાપાયે અસર થઇ હતી.
