બોલીવૂડમાં ઘણા સમયથી અભિષેક બચ્ચન અને ઐશ્વર્યા રાય વચ્ચે છૂટાછેડાની અટકળો થઇ રહી છે. આ અંગે બચ્ચન પરિવારમાંથી કે ઐશ્વર્યા તરફથી કોઈએ આવી અટકળોને સમર્થન કે રદિયો આપ્યો નથી, પરંતુ જરૂર જણાતા અમિતાભ બચ્ચને સોશિયલ મીડિયામાં સાંકેતિક ખુલાસો કર્યો હતો. પછી ઐશ્વર્યા અને અભિષેક પણ આદર્શ દંપતિની જેમ સાથે જોવા મળ્યા હતા. તાજેતરમાં ફિલ્મ મેકર આશુતોષ ગોવારિકરના દીકરાના લગ્ન પ્રસંગે ઐશ્વર્યા અને અભિષેકે હાજરી આપી હતી અને તેઓ સતત એકબીજાની સાથે જોવા મળતા હતા. આશુતોષના દીકરાના લગ્ન નિમિત્તે યોજાયેલી ભવ્ય પાર્ટીના ફોટોગ્રાફ્સ વાઈરલ થઈ રહ્યા છે, જેમાં આઈવરી ડ્રેસમાં અભિષેક અને ઐશ્વર્યાએ આકર્ષણ જમાવ્યું હતું. તેમણે નવદંપતિ કોણાર્ક ગોવારિકર અને નિયતિ કણકિયા સહિત સમગ્ર પરિવારસાથે ફોટો સેશન કર્યુ હતું. તેમણે આશુતોષને ખૂબ ઉત્સાહથી શુભેચ્છા આપી હતી. આશુતોષ અને ઐશ્વર્યાએ સાથે પડાવેલો ફોટોગ્રાફ્સ બંને પરિવાર વચ્ચેની નિકટતા દર્શાવતો હતો. ઈસ્કોનના હરિનામ દાસ પણ આ પ્રસંગે હાજર હતા. અભિષેક અને ઐશ્વર્યાએ બે હાથ જોડી તેમનું અભિવાદન કર્યુ હતું. ઐશ્વર્યાએ એથનિક સૂટ અને અભિષેક બંધ ગળાનો ડ્રેસ પસંદ કર્યો હતો. સામાન્ય રીતે બચ્ચન પરિવારમાંથી ઐશ્વર્યા અને જયા બચ્ચન ભાગ્યે જ સાથે જોવા મળે છે. અપવાદરૂપે ગોવારિકરના ઘરે લગ્નપ્રસંગમાં સાસુ-વહુ પણ સાથે જોવા મળ્યા હતા. ગોવારિકરના મહેમાન બનેલા અન્ય સેલિબ્રિટીઝમાં શાહરૂખ ખાન, આમિર ખાન, રિતિક રોશન, અનુપમ ખેર, ચંકી પાંડે અને પૂજા હેગડે, સોનાલી બેન્દ્રે, રિતેશ દેશમુખ-જેનેલિયા ડીસોઝાનો સમાવેશ થાય છે. ગોવારિકરની સફળ ફિલ્મોમાં લીડ રોલ કરનારી ગ્રેસી સિંહ અને ગાયત્રી જોશી પણ આ પ્રસંગે જોવા મળ્યા હતા.
