પેટ્રોલ-ડીઝલ સહિતની ચીજવસ્તુઓની મોંઘવારીએ માઝા મુકી છે ત્યારે અમૂલે પણ દૂધના ભાવમાં વધારો કરવાની જાહેરાત કરી મધ્યમ વર્ગને આંચકો આપ્યો હતો. અમૂલે દૂધની કિંમતમાં પ્રતિ લિટર બે રુપિયાનો ધરખમ વધારોની કરવાની બુધવારે જાહેરાત કરી હતી. આ ભાવવધારો 1 જૂલાઈથી અમલી બનશે. અમૂલની ગોલ્ડ, તાજા, શક્તિ, ગાયના દૂધ સહિતની તમામ બ્રાન્ડ માટે 500 મિલીના પાઉચ માટે 1 રુપિયો વધારે ચૂકવવો પડશે.
છેલ્લા ઘણા સમયથી દૂધના ભાવોમાં કોઈ વધારો નહોતો કરવામાં આવ્યો હતો. જોકે, હવે પેટ્રોલ-ડીઝલની કિંમતોમાં થયેલા સતત વધારાને કારણે ટ્રાન્સપોર્ટેશન મોંઘું થતાં તેમજ અન્ય ખર્ચ પણ વધી જતાં અમૂલે દૂધના ભાવ વધાર્યા છે. તાજેતરમાં જ સુરતમાં દૂધના ભાવોમાં વધારો કરવામાં આવ્યો હતો. ગુજરાતમાં પાઉચમાં વેચાતા દૂધનું મોટાભાગનું માર્કેટ અમૂલ પાસે છે. દૂધના ભાવોના વધારા બાદ અમૂલની અન્ય પ્રોડક્ટ્સની કિંમતોમાં પણ વધારો થાય તો નવાઈ નહીં. ગુજરાત કો-ઓપરેટિવ મિલ્ક માર્કેટિંગ ફેડરેશન લિમિટેડ અમૂલ બ્રાંડના નામે દૂધ તેમજ ડેરી પ્રોડક્ટ્સનું વેચાણ કરે છે. કંપની 2024-25 સુધીમાં પોતાનું કુલ વેચાણ 1 લાખ કરોડ રુપિયા સુધી લઈ જવાનો પ્લાન ધરાવે છે. તેની ગણના દુનિયાના ટોચના દસ ડેરી ઓર્ગેનાઈઝેશનમાં થાય છે, અને તેનો ટાર્ગેટ ટોપ થ્રીમાં સામેલ થવાનો છે.
