બોલીવૂડમાં આ વર્ષે રોમેન્ટિક અને લવ સ્ટોરીઝ આધારિત ફિલ્મોનો દબદબો રહેશે તેવું જાણવા મળ્યું છે. ગત વર્ષે રાજકારણ અને હિંસા પ્રધાન કહાની આધારિત ફિલ્મો સફળ થઇ હતી. આ વર્ષે જે રોમેન્ટિક ફિલ્મો રજૂ થશે તેની ટૂંક વિગતો અહીં રજૂ કરવામાં આવી છે.
ચાંદ મેરા દિલ
આ ફિલ્મનું દિગ્દર્શન વિવેક સોનીએ કર્યું છે અને તેનું નિર્માણ જાણીતા ફિલ્મકાર કરણ જોહરના ધર્મા પ્રોડકશન્સ દ્વારા કરવામાં આવ્યું છે. ફિલ્મમાં મુખ્ય ભૂમિકામાં લક્ષ્ય અને અનન્યા પાંડે છે. 10 એપ્રિલે આ ફિલ્મ થીયેટરમાં રીલીઝ થશે. અનન્યા પાંડે છેલ્લે વિક્રમાદિત્ય મોટવાણીની કન્ટ્રોલમાં જોવા મળી હતી. તો લક્ષ્ય ધર્મા પ્રોડકશન્સની જ ફિલ્મ કીલમાં જોવા મળ્યો હતો.
આવારાપન-ટુ
આ ફિલ્મમાં ઇમરાન હાશ્મી મુખ્ય ભૂમિકામાં છે. આ રોમેન્ટિક ફિલ્મનું દિગ્દર્શન નીતિન કક્કરે કર્યું છે. આ ફિલ્મમાં દિશા પાટની પણ મુખ્ય ભૂમિકા છે આ ઉપરાંત શબાના આઝમી પણ પ્રથમવાર વિશેષ ફિલ્મ્સના પ્રોડકશનમાં મહત્વની ભૂમિકામાં જોવા મળશે. આ ફિલ્મ 3 એપ્રિલે રજૂ થશે.
હૈ જવાની તો ઇશ્ક હોના હૈ
આ ફિલ્મમાં વરૂણ ધવન મુખ્ય ભૂમિકામાં છે. તેમાં વરૂણની સાથે પૂજા હેગડે અને મૃણાલ ઠાકુર જોવા મળશે. આ ફિલ્મ 5 જુને રજૂ થશે. આ ફિલ્મનું દિગ્દર્શન ડેવિડ ધવને કર્યું છે.
તુ મેરી ઝિંદગી હૈ
જાણીતા ફિલ્મકાર અનુરાગ બાસુના દિગ્દર્શનમાં નિર્મિત આ મ્યુઝિકલ રોમેન્ટિક ફિલ્મ 1 મેના રોજ રજૂ થવાની સંભાવના છે. અગાઉ આ ફિલ્મનું નામ આશિકી-3 રાખવામાં આવ્યું હતું, પરંતુ પછી કાયદાકીય વિવાદને કારણેએ તેને ફિલ્મના લોકપ્રિય ગીતના મુખડાનું શીર્ષક બનાવવામાં આવ્યું છે. તુ મેરી ઝિંદગી હૈ…. ફિલ્મમાં કાર્તિક આર્યન અને શ્રીલીલા રોમાન્સ કરતાં જોવા મળશે.
સિલા
હર્ષવર્ધન રાણેની નવી ફિલ્મ સિલા આ વર્ષે જોવા મળશે. તેમાં હર્ષવર્ધન રાણેની સાથે સાદિયા ખતીબે જોડી જમાવી છે. જ્યારે ફિલ્મમાં વિલન તરીકે કરણવીર મહેરા જોવા મળશે. આ ફિલ્મના દિગ્દર્શક ઓમંગ કુમાર છે. સરબજીત અને મેરી કોમ જેવી સફળ ફિલ્મો બનાવનારા ઓમંગકુમારની રોમેન્ટિક ફિલ્મ કેવી હશે તે અંગેની આતુરતા ચાહકોમાં જોવા મળી રહી છે.
લાયકી લાયકા
આ ફિલ્મમાં મુખ્ય કલાકાર તરીકે અભય વર્મા અને રવિના ટંડનની પુત્રી રાશા થડાણી છે. લાયકા લાયકી નામની આ રોમેન્ટિક એક્શન ફિલ્મ પણ આ વર્ષે રીલિઝ કરવાનું આયોજન છે. આ ફિલ્મનું દિગ્દર્શન સૌરભ ગુપ્તાએ કર્યું છે. રાશાના ચાહકો આ ફિલ્મની આતુરતાપૂર્વક રાહ જોઇ રહ્યા છે.
