ટી-20 વર્લ્ડકપની સુપર-8ની મેચમાં 24 ફેબ્રુઆરીએ પાકિસ્તાનને બે વિકેટે હરાવીને ઇંગ્લેન્ડે આ ટુર્નામેન્ટની સેમિફાઇનલમાં પ્રવેશ કર્યો હતો. કેપ્ટન હેરી બ્રુક્સે માત્ર 51 બોલમાં સદી ફટકારતા ઇંગ્લેન્ડ આ ટુર્નામેન્ટની ફાઇનલમાં પહોંચનારી પ્રથમ ટીમ બની હતી.
પ્રથમ બેટિંગ કરતાં પાકિસ્તાને તેની 20 ઓવરમાં નવ વિકેટે 164 રન બનાવ્યાં હતાં. આ ટાર્ગેટનો પીછો કરતાં ઇંગ્લેન્ડે 19.1 ઓવરમાં આઠ વિકેટ ગુમાવીને 166 રન કરી દીધા હતાં. હેરી બ્રુકે સામે છેડે વિકેટો પડતી રહી હોવા છતાં શાનદાર બેટિંગ કરીને 51 બોલમાં ચાર સિક્સર અને દસ ચોગ્ગા સાથે 100 રન ફટકાર્યા હતાં.
ટીમને જીતવા માટે દસ રનની જરૂર હતી ત્યારે બ્રુક આઉટ થઈ ગયો હતો. અંતિમ ઓવર્સમાં થોડી રસાકસી રહી હતી, પરંતુ તેમ છતાં ઇંગ્લેન્ડે સફળતા હાંસલ કરી લીધી હતી. પાકિસ્તાન માટે શાહિન આફ્રિદીએ ચાર વિકેટ લીધી હતી તો ઉસ્માન તારીક અને મોહમ્મદ નવાઝે બે બે વિકેટ લીધી હતી.
મેચ જીતવા માટે 165 રનના ટારગેટ સામે રમતાં ઇંગ્લેન્ડે ઇનિંગ્સના પહેલા જ બોલે સ્ટાર બેટર ફિલ સોલ્ટની વિકેટ ગુમાવી દીધી હતી. શાહિન આફ્રિદીએ તેને આઉટ કર્યો હતો. થોડી જ વારમાં જોઝ બટલર પણ આઉટ થઈ ગયો હતો. અગાઉ પાકિસ્તાને પ્રથમ બેટિંગ કરતાં શરૂઆતમાં જ વિકેટ ગુમાવી દીધી હતી. જોકે સાહિબજાદા ફરહાને એક છેડો સાચવી રાખીને મક્કમ બેટિંગ કરી હતી. સઇમ ઐયૂબ અને કેપ્ટન સલમાન આગા સસ્તામાં આઉટ થઈ ગયા હતા. ત્યાર બાદ બાબર આઝમ, ફખર ઝમાન અને શાદાબ ખાને ઉપયોગી યોગદાન આપીને ટીમને નોંધપાત્ર સ્કોર સુધી પહોંચાડી હતી. બાબરે 24 બોલમાં અને ફખર ઝમાને 16 બોલમાં 25-25 રન ફટકાર્યા હતા. શાદાબ ખાને માત્ર 11 જ બોલ રમીને 23 રન ફટકાર્યા હતા.
જોકે ટીમની બેટિંગનું આકર્ષણ સાહિબજાદા ફરહાન રહ્યો હતો. તેણે 45 બોલમાં સાત ચોગ્ગા અને બે સિક્સર સાથે 63 રન ફટકાર્યા હતા. ઇંગ્લેન્ડ માટે લિયમ ડાઉસને 24 રનમાં ત્રણ વિકેટ લીધી હતી તો જોફરા આર્ચર અને જેમી ઓવર્ટને બે બે વિકેટ લીધી હતી.
