ટેનિસ ખેલાડી લિએન્ડર પેસે મંગળવારે ભારતીય જનતા પાર્ટી (ભાજપ)માં જોડાઇમાં નવી ઇનિંગનો પ્રારંભ કર્યો હતો. 51 વર્ષીય પેસ પશ્ચિમ બંગાળમાં વિધાનસભા ચૂંટણી પહેલા ભાજપમાં જોડાયા છે. પશ્ચિમ બંગાળમાં તણમૂલ કોંગ્રેસ સત્તામાં છે. રસપ્રદ વાત એ છે કે પેસ 2021માં મમતા બેનર્જીની પાર્ટીમાં જોડાયા હતાં અને 2022માં ગોવાની ચૂંટણી દરમિયાન તેના માટે પ્રચાર કર્યો હતો.
નવી દિલ્હીમાં પાર્ટીના મુખ્ય મથક ખાતે કેન્દ્રીય પ્રધાન કિરેન રિજિજુની હાજરીમાં તેઓ પાર્ટીમાં જોડાયા હતા. આ પ્રસંગે રિજિજુએ તેને ‘ઐતિહાસિક દિવસ’ ગણાવતા કહ્યું કે જે સમયે ભારતના નામે ઓલિમ્પિકમાં મેડલ નહોતા આવતા, તે સમયે પેસે દેશનું નામ રોશન કર્યું હતું અને હવે તે ભાજપના મંચ પરથી દેશની સેવા કરશે. કોલકાતામાં ભાજપના રાષ્ટ્રીય અધ્યક્ષ નિતિન નવીન સાથેની તાજેતરની મુલાકાત બાદ પેસના આ નિર્ણયની અટકળો ઘણા સમયથી ચાલી રહી હતી.
ત્રણ દાયકાથી વધુ સમય સુધી પેસ ભારતીય ટેનિસનો ચહેરો હતો. પેસે સૌપ્રથમ ૧૯૯૬ના એટલાન્ટા ઓલિમ્પિકમાં પુરુષોની સિંગલ્સમાં બ્રોન્ઝ મેડલ જીતીને દેશનું ધ્યાન ખેંચ્યું હતું, જે એક સીમાચિહ્નરૂપ સિદ્ધિ હતી.પોતાની કારકિર્દી દરમિયાન પેસે ૧૮ ગ્રાન્ડ સ્લેમ ટાઇટલ જીત્યા હતાં, જેમાં મેન્સ ડબલ્સમાં આઠ અને મિક્સ ડબલ્સમાં 10નો સમાવેશ થાય છે. તે વર્ષો સુધી ભારતીય ડેવિસ કપ ટીમનો મુખ્ય આધારસ્તંભ પણ રહ્યો, તેણે ઉચ્ચ ક્રમાંકિત પ્રતિસ્પર્ધીઓ સામે ઘણી યાદગાર જીત મેળવી.મહેશ ભૂપતિ સાથેની જોડીને ‘ઇન્ડિયન એક્સપ્રેસ’ તરીકે ઓળખવામાં આવતી હતી. તેમની ભાગીદારીએ ભારતને ડબલ્સ ટેનિસમાં વૈશ્વિક સ્તરે ઓળખ અપાવી હતી.
