ભારતીય રાજદૂત વિનય મોહન ક્વાત્રાએ અમેરિકાના સાંસદો સાથે વાજબી, સંતુલિત અને પરસ્પર ફાયદાકારક વેપાર સંબંધો અંગે ચર્ચાવિચારણા કરી હતી. ભારતીય રાજદૂત 9 ઓગસ્ટ પછી 23 અમેરિકી સાંસદોને મળ્યાં છે.
શનિવારે ક્વાત્રા સીપાવર એન્ડ પ્રોજેક્શન ફોર્સિસ અંગેની પેટા કમિટીના રેન્કિંગ સભ્ય કોંગ્રેસમેન રેપ જો કોર્ટનીને મળ્યાં હતાં અને બંને દેશો વચ્ચે દ્વિપક્ષીય ભાગીદારીને ટેકો આપવા બદલ તેમનો આભાર માન્યો હતો. ક્વાત્રાએ સોશિયલ મીડિયા પર પોસ્ટ કર્યું હતું કે વાજબી, સંતુલિત અને પરસ્પર ફાયદાકારક વેપાર સંબંધોની જરૂરિયાત સહિત વેપાર અને આર્થિક સહયોગ પર ભારતના વલણની રજૂઆત કરી હતી.
તેમણે હાઉસ ફોરેન અફેર્સ કમિટી ડેમોક્રેટ્સના વાઇસ રેન્કિંગ સભ્ય કોંગ્રેસમેન ગેબે એમો સાથે પણ ફળદ્વુપ ચર્ચાવિચારણા કરી હતી. તેમણે દ્વિપક્ષીય સંબંધો માટે એમોના સમર્થનની પ્રશંસા કરી કરી હતી. તેમણે સબકમિટી ઓન ઓવરસાઇટ એન્ડ ઇન્ટેલિજન્સ (HFAC)ના રેન્કિંગ સભ્ય કોંગ્રેસમેન જેરેડ મોસ્કોવિટ્ઝ સાથે પણ આવી જ વાતચીત કરી હતી. કોંગ્રેસમેન બેન ક્લાઇન સાથેની વાતચીતમાં ભારતીય રાજદૂતે અમેરિકા પાસેથી ભારતની વધતી જતી હાઇડ્રોકાર્બન ખરીદી પર પ્રકાશ પાડ્યો હતો.
યુએસ પ્રમુખ ડોનાલ્ડ ટ્રમ્પ દ્વારા ભારત પર કુલ 50 ટકા ટેરિફ લાદવામાં આવ્યા પછી ભારત-અમેરિકા સંબંધોમાં તણાવ વચ્ચે આ શ્રેણીબદ્ધ બેઠકો યોજાઈ રહી છે. રશિયન ક્રૂડ ઓઇલની ખરીદીનો બચાવ કરતા ભારતે જણાવ્યું હતું કે તેની ઊર્જા ખરીદી રાષ્ટ્રીય હિત અને બજારની ગતિશીલતા આધારિત છે.
