અમેરિકામાં એક સગીર પર જાતીય હુમલો કરવાના આરોપમાં ભારતીય વ્યક્તિની ધરપકડ કરાઈ હતી. યુએસ ઇમિગ્રેશન એન્ડ કસ્ટમ્સ એન્ફોર્સમેન્ટ (ICE)એ જણાવ્યું હતું કે વોડેલા યશસ્વી કોટ્ટાપલ્લી તરીકે ઓળખાયેલ આરોપી અમેરિકામાં એક ગેરકાયદે ઇમિગ્રન્ટ છે અને યુએસ ઇમિગ્રેશન કાયદા હેઠળ તેને દેશનિકાલ કરવાની કાર્યવાહી ચાલી રહી છે. તેના પર દુકાનમાં ચોરી અને જાહેર અવ્યવસ્થાનો પણ આરોપ છે.
ICE એ X પરની એક પોસ્ટમાં જણાવ્યું હતું કે “ભારતમાંથી ગેરકાયદેસર રીતે અમેરિકામાં રહેતા વોડેલા યશસ્વી કોટ્ટાપલ્લી પર ન્યુ જર્સીમાં જાતીય હુમલો અને ચોરીના આરોપો છે. અમે તેને દેશનિકાલની કાર્યવાહી સુધી કસ્ટડીમાં રાખીશું.”
કોટ્ટાપલ્લીને ‘ચાઇલ્ડ રેપિસ્ટ’ ગણાવતા ICEએ કહ્યું હતું કે ભારતીય પુરુષ પર 13 વર્ષથી ઓછી ઉંમરના બાળક પર જાતીય હુમલો કરવાનો આરોપ છે. જોકે એજન્સીએ ધરપકડની તારીખ અથવા કથિત ગુનાઓની અન્ય કોઈ વિગતો જાહેર કરી નથી.
