અમેરિકામાં વિઝાના કડક નિયમોને કારણે ભારતીય વિદ્યાર્થીની સંખ્યામાં 6.9 ટકાનો ઘટાડો નોંધાયો છે. આ અંગે ભારત સરકારે સંસદમાં એક નિવેદનમાં જણાવ્યું હતું કે, અમેરિકામાં ફેબ્રુઆરી 2026ની સ્થિતિએ પ્રાયમરી સ્કૂલથી લઈને યુનિવર્સિટી સુધીના વિવિધ શૈક્ષણિક અભ્યાસક્રમોમાં ભારતીય વિદ્યાર્થીઓની સંખ્યા આશરે 3.5 લાખ હતી, જે ગત વર્ષના આ જ સમયગાળાની સરખામણીએ અંદાજે 6.9 ટકાનો ઘટાડો દર્શાવે છે. સંસદમાં વિદેશ મંત્રાલયને પૂછાયું હતું કે, અમેરિકામાં ભારતીય વિદ્યાર્થીઓના પ્રવેશમાં ઘટાડો થયો છે કે નહીં અને વિઝા સ્લોટની અછત તથા વધુ વિઝા રીજેક્શન રેટની કેટલી અસર થઈ છે. આ અંગેના લેખિત જવાબમાં રાજ્યકક્ષાના વિદેશ પ્રધાન કીર્તિવર્ધન સિંહે યુએસ હોમલેન્ડ સિક્યોરિટી ડીપાર્ટમેન્ટના સ્ટુડન્ડ એન્ડ એક્સ્ચેન્જ વિઝિટર ઇન્ફર્મેશન સિસ્ટમ (SEVIS) મેપિંગ ટુલના ડેટા આપ્યાં હતાં. આ ડેટા મુજબ ફેબ્રુઆરી 2026ના રોજ અમેરિકામાં ભારતના વિદ્યાર્થીઓની કુલ સંખ્યા આશરે 3.52 લાખ હતી, જે ફેબ્રુઆરી 2025માં આશરે 3.78 લાખ હતી, જે આશરે 6.9 ટકાનો ઘટાડો દર્શાવે છે. વિઝા ચકાસણીમાં વધારાથી ભારતીય વિદ્યાર્થીઓની સંખ્યામાં ઘટાડો થયો છે કે કે નહીં તેવો પણ સવાલ કરાયો હતો. અમેરિકા તેની રાષ્ટ્રીય સુરક્ષા માટે જોખમી હોય તેવા તેવા અરજદારોની ઓળખ કરવા માટે વિઝા સ્ક્રીનિંગ અને ચકાસણી માટે તમામ ઉપલબ્ધ માહિતીનો ઉપયોગ કરે છે. નવી માર્ગદર્શિકા હેઠળ F, M અને J કેટેગરીના વિદ્યાર્થીઓ અને એક્સચેન્જ વિઝિટર્સ માટે ઓનલાઇન અને સોશિયલ મીડિયા પ્રોફાઇલ્સની પણ તપાસ થાય છે.
